دادو(این این آئی) سفاک شخص نے تین سالہ بچی کوبے آبرو کر دیا، دادو میں تھانہ بی سیکشن کی حدود چھانو شاہ آباد محلہ میں ملزم ایاز پنہور نے 3 سالہ معصوم بچی سے افسوسناک فعل کرکے منہ کالا کر لیا۔ ایس ایچ او وویمن بے نظیر جمالی جائے وقوعہ پہنچ گئیں تو بچی کو دیکھ کر آبدیدہ ہوگئیں۔ وہ معصوم بچی کو ساتھ لے کر اسپتال

پہنچیں تو لیڈی ڈاکٹر ڈیوٹی سے غائب تھی جس پر ایس ایچ او وومین اسپتال عملے پر برہم ہوگئیں۔ایس ایچ او وومین جذبات پر قابو نہ کر سکیں۔ انہوں نے کہا کہ ایک گھنٹہ ہوگیا ہے لیڈی ڈاکٹر موجود نہیں، اسپتال کو تالا لگا کر بند کر دیں۔ وہ اسپتال سے لیڈی ڈاکٹر کو ڈھونڈ کر ایمرجنسی وارڈ لے گئیں جبکہ ڈی سی دادو اور ایس ایس پی دادو بھی ہسپتال پہنچے۔ایس ایس پی دادو اعجاز احمد شیخ نے بتایا کہ بچی کی عمر 3 سال ہے اور ملزم کو گرفتار کرلیا ہے جسے کیفر کردار تک پہنچایا جائے گا۔ بچی سے ابتدائی میڈیکل رپورٹ میں گھناؤنے فعل کی تصدیق ہوگئی۔دوسری جانب سرگودھا کے قصبہ سلانوالی میں محنت کش کے12 سالہ بچے کو موٹرسائیکل سواروں نے اغواء کر کے گھناؤنے فعل کا نشانہ بنا ڈالا اور لوگوں کے متوجہ ہونے پر اسی حالت میں چھوڑ کر فرار ہو گئے۔زرائع کے مطابق تحصیل سلانوالی کے علاقہ بگی پورہ کے محمد اختر کا 12 سالہ بیٹا منیب اختر سودا سلف خریدنے گھر سے نکلا تو راستہ میں 2 موٹرسائیکل سواروں نے اسے اغواء کر لیا اور موٹرسائیکل پر سوار کر کے چک 122 جنوبی کے باغات میں لے گئے جہاں زبردستی بچے کو گھناؤنے فعل کا نشانہ بنا ڈالااور بچے کی چیخ وپکار پر لوگوں کے متوجہ ہونے پر موٹرسائیکل سوار مغوی کو اسی حالت میں چھوڑ کر فرار ہو گئے،

پولیس تھانہ سلانوالی نے بچے کے والد کی مدعیت میں دونوں موٹر سائیکل سوار ملزمان کے خلاف زیر دفعہ 377/114 ت پ مقدمہ درج کر کے تفتیش شروع کر دی اور بچے کی میڈیکل رپورٹ کے لئے اسے ٹی ایچ کیو ہسپتال بجھوا دیا جبکہ مرکزی ملزم کو گرفتار کر کے جائے واردات کا معائنہ کیا۔