کراچی(این این آئی)کراچی میں گلشن اقبال بلاک4 اے کے ملحقہ علاقے قائداعظم کالونی میں بیوی نے45سالہ سابقہ شوہرولی محمد کو فائرنگ کرکے قتل کر دیا۔فائرنگ کرنے والی ملزمہ شاہین بی بی کو پولیس نے حراست میں لے لیا ہے۔پولیس کے مطابق گھر میں جھگڑے کے

دوران خاتون نے فائرنگ کر دی جس سے سابقہ شوہر موقع پر ہی جاں بحق ہوگیا۔پولیس حکام کے مطابق مقتول نے 3 شادیاں کر رکھی تھیں اور تینوں بیویاں ساتھ رہتی تھیں۔ مقتول کے تینوں بیویوں سے 13 بچے ہیں۔ پولیس نے خاتون کے سابق شوہر کی لاش کو پوسٹ مارٹم کیلیے اسپتال منتقل کر دیا ہے۔ملزمہ نے پولیس کو دیئے گئے بیان میں کہا کہ میرا شوہر مجھ پر ظلم کرتا تھا۔ میرے جسم پر تشدد کے نشان بھی ہیں۔ میری بچیوں پر گندے جملے بولتا تھا۔ شوہر کو اسلحہ اس کے دوست نے تحفہ میں دیا تھا۔ملزمہ نے کہا کہ چند دن پہلے میری بیٹی گھر سے بھاگ گئی تھی۔ میں نے ظلم سے تنگ آکر یہ قدم اٹھایا۔ یہ بیٹی کو بھگانے کا الزام مجھ پر لگاتا تھا۔پولیس کے مطابق ملزمہ شاہین سے 4 بیٹے اور 4 بیٹیاں تھی۔ ملزم2013 میں ملزمہ کو طلاق دے چکا ہے۔ مقتول ولی محمد کے سر میں ایک گولی لگی، خاندان میں تنازعہ تھا، اسلحہ برآمد کرلیا گیا ے۔