لاہور (این این آئی) مسلم لیگ (ن ) کی نائب صدر مریم نواز نے کہا ہے کہ پٹرول بم گرانے کے ایک ہفتے کے اندر بجلی کی قیمتوں میں اضافہ بدترین عوام دشمنی ہے،پٹرول اور بجلی کی قیمتوں کا اثر ضروریات زندگی کے تمام اشیا پر ہوتا ہے۔ اپنے ٹویٹ میں انہوںنے کہاکہ کیا حکومت نے عوام کو اس قابل چھوڑا ہے کہ وہ نااہلی کے

عذاب کا ہر ہفتے مقابلہ کرسکیں ؟ غریب کیسے زندہ رہے؟ ،عوام کا خون چوسنا نالائق اعظم سے بہتر کوئی نہیں جانتا ،اس شخص کا وزیراعظم کی کرسی پر گزارا گیا ایک ایک لمحہ عوام پر بھاری ہے جو حکومت عوام کے ووٹ سے نہیں آتی اسے نا عوام کا احساس ہوتا ہے نا وہ عوام کو جوابدہ ہوتی ہے ،یہ سمجھ گیا ہے کہ اسکی ناجائز حکومت کے ساتھ اسکی سیاست بھی ختم،7 سال سے پارٹی کا بانی رکن دہائی دے رہا ہے ،7 سال سے تم درخواستیں دے رہے ہو کہ کارروائی خفیہ رکھی جائے ،7سال سے تم کاغذات پیش نہیں کر رہے ،7 سال سے تم تاخیری ہتھکنڈے استعمال کر رہے ہو ،7 سال سے تم وکیل تبدیل کر رہے ہو ،7 سال سے اپیل کر رہے ہوکہ الیکشن کمیشن کو اکانٹس دیکھنے سے روکا جائے ،اب یاد آئی ہے اوپن سماعت کی تھوڑا صبر کرو ۔ اب تو بہت کچھ اوپن ہونے کو ہے۔دوسری جانب وزیر توانائی عمر ایوب نے کہا ہے کہ مسلم لیگ (ن)کی حکومت بجلی سے متعلق لازمی ادائیگی 227 ارب روپے کی بارودی سرنگ ہمارے لئے چھوڑ کر گئی اور اب بجلی کی قیمت ایک روپے 95 پیسے فی یونٹ بڑھانے جارہے ہیں۔اسلام آباد میں وزیر منصوبہ بندی و ترقی اسد عمر اور معاون خصوصی تابش گوہر کے ہمراہ پریس بریفنگ کے دوران انہوں نے کہا کہ مسلم لیگ (ن)نے بجلی کی مد میں لازمی ادائیگی

کا قرضہ ہمارے لیے چھوڑا جو 227 ارب روپے تھا۔عمر ایوب نے بتایا کہ بجلی استعمال کی جائے یا نہ کی جائے بجلی کے کارخانوں کو 2023 تک ایک ہزار 455 ارب روپے ادائیگی کرنی پڑے گی، یہ وہ بارودی سرنگ ہے جو مسلم لیگ (ن)نے قصدا، بدنیتی کے ساتھ ایسے معاہدے کیے۔