اسلام آباد (این این آئی) نجکاری بورڈ نے تین اداروں کی نجکاری کیلئے پری کوالیفیکیشن کمیٹیوں کی تشکیل کی منظوری دیدی۔وفاقی وزیر نجکاری محمد میاں سومرو کی زیر صدارت نجکاری بورڈ کا اجلاس ہوا جس میں اداروں کا نجکاری سمیت پاور ڈسٹری بیوشن کمپنیوں کی نجکاری پر غور کیا گیا۔ بورڈ کو جناح کنونشن سنٹر، ہاؤس بلڈنگ

فنانس کارپوریشن اور فرسٹ ویمن بینک لمیٹڈ کی نجکاری کے حوالے سے پیش رفت پر تفصیلی بریفنگ دذی گئی۔تینوں اداروں کی نجکاری کیلئے پری کوالیفیکیشن کمیٹیوں کی تشکیل کی منظوری دی گئی۔ تینوں اداروں کی ٹرانزیکشن کمیٹیاں پہلے ہی کابینہ کمیٹی اور کابینہ سے منظور شدہ ہیں،تینوں اداروں کی نجکاری کیلئے اظہار دلچسپی کے ٹینڈرز وسط فروری میں متوقع ہیں،مذکورہ اداروں کے مالیاتی مشیر کی متوقع سرمایہ کاروں کے لئے مارکیٹنگ کی بھی منظوری دی گئی،بورڈ کو وفاقی حکومت کی تئیس پراپرٹیز کی فروخت کے حوالے سے صورتحال سے آگاہ کیا گیا۔ اجلاس کو بتایاگیاکہ فروری میں ان 23 جائیدادوں کی نیلامی مکمل ہوگی، پاور ڈسٹریبیوشن کمپنیز کی بتدریج نجکاری اور مختلف تجاویز پر بورڈ میں آراء کا تبادلہ کیا گیا۔پاور ڈویژن اور وزارت نجکاری مذکورہ ڈسکوز کی نجکاری کے لیئے متفقہ طور پر ٹی او آرز مرتب کریں گے،ان ٹی او آرز کی روشنی میں پاور ڈسٹریبیوشن کمپنیوں کی نجکاری کے لیئے بہترین ٹرانزیکشن اسٹرکچر اور مؤثر حکمت عملی ترتیب دی جائے گی۔بورڈ ممبران نے ڈسکوز کی نجکاری کے حوالے سے اپنی تجاویز وزارت میں جمع کرانے کی سفارش کر دی۔ محمدمیاں سومرو نے کہاکہ پاور، ہاؤسنگ اور دیگر سیکٹرز کی استعداد و کارکردگی میں بہتری لانا چاہتے ہیں۔