لاہور (آن لائن) وزیرہائوسنگ و اربن ڈویلپمنٹ پنجاب میاں محمودالرشید نے کہاہے کہ اپوزیشن کی سرتوڑ کوششوں کے باوجود لاہور’’ٹھنڈاٹھار‘‘ ہے۔اپوزیشن جماعتیں جتنا مرضی زور لگا لیں لاہور والے ان کی کال پرباہر نہیںنکلیں گے۔13دسمبر کو اپوزیشن کے غبارے سے
رہی سہی ہوا بھی نکل جائے گی۔موجودہ سیاسی صورتحال پر تبصرہ کرتے ہوئے میاں محمودالرشیدنے کہاکہ لاہور والے جب از خود نکلتے ہیں تو پورے ملک کوعلم ہو جاتاہے۔30اکتوبر2011ء کو عمران خان کی کال پرلاہور میں لاکھوں لوگ نکلے تھے۔انہوں نے کہاکہ اپوزیشن کی استعفوں کی دھمکی سیاسی چال سے زیادہ اور کچھ نہیں۔اپوزیشن جماعتیں استعفوں کے معاملے پر کبھی متفق نہیں ہوسکتیں۔کورونا کے باوجود اپوزیشن کا جلسوں پر اصرار عوام دشمنی ہے۔پی ڈی ایم سیاسی مفاد کیلئے عوام کی زندگیوں کو دائو پر لگا رہی ہے۔احتساب سے بچنے کیلئے عوام کو ڈھال بنایا جا رہا ہے۔انہوں نے کہاکہ پیپلزپارٹی اور (ن) لیگ کی کرپٹ لیڈرشپ بدعنوانی کے مقدموں سے اپنی جان بچانے کیلئے پی ڈی ایم کے پلیٹ فارم کو استعمال کر رہی ہے۔
