اسلام آباد(مانیٹرنگ ڈیسک /این این آئی)لاہور پولیس نے 13دسمبر کو پی ڈی ایم کے جلسے میں دہشتگردی کے خطرہ کا الرٹ جاری کر دیا ہے ۔ جاری مراسلے میں کہا گیا ہے کہ مذہبی ، سیاسی قائدین بالخصوص ن لیگ کے رہنما رانا ثناء اللہ کو دہشتگرد نشانہ بنا سکتے ہیں ، لیگی رہنما رانا ثنا اللہ کو مشورہ دیا گیا کہ وہ بلٹ پروف گاڑی استعمال کریں ، ریلیاں اور کارنرز میٹنگز کو منسوخ کر دیں
، پولیس نے 13دسمبر کا جلسہ بھی منسوخ کرنے کا کہا ہے ۔ دوسری جانب پی ڈی ایم کے لاہور جلسے میں ممکنہ دہشت گردی کے حملے کا خدشہ، لاہور پولیس نے تھریٹ الرٹ جاری کردیا۔نجی ٹی وی کے مطابق لاہور پولیس نے پی ڈی ایم جلسے کے حوالے سےمریم نواز اور رانا ثنااللہ سمیت دیگر سیاسی قیادت کو ممکنہ حملے کے خطرے سے آگاہ کر دیا۔ پولیس کی جانب سے تھریٹ الرٹ میں پی ڈی ایم قیادت کو جلسہ منسوح کرنے کی درخواست کی گئی ہے تاہم جلسہ منسوخ نہ کرنے پر پولیس نے مریم نواز اور رانا ثنا اللہ کو سخت حفاظتی ہدایات جاری کردی ہیں۔تھریٹ الرٹ کے مطابق مریم نواز اور رانا ثنااللہ دوران سفر بلٹ پروف گاڑی کا استعمال کریں، گاڑی کے سن روف سے ہرگز باہر نہ نکلا جائے اور نہ ہی کوئی تقریر کی جائے۔پولیس الرٹ کے مطابق دوران جلسہ لاؤڈ اسپیکر کے استعمال سے گریز کیا جائے، کورونا وبا کے پیش نظر حکومتی ایس او پیز پر مکمل عملدرآمد کیا جائے، سیاسی قائدین سمیت جلسہ گاہ کی سکیورٹی بھی بڑھائی جائے گی۔
