پشاور(این این آئی) عوامی نیشنل پارٹی کے صوبائی صدر ایمل ولی خان نے کہا ہے کہ عمران خان کا کزن ڈاکٹر برکی صوبے کے صحت کے نظام کے ساتھ کھلواڑ کررہا ہے۔ اپنی غیرموجودگی میں صوبے کے سب سے بڑے ہسپتال کا انچارج ایک کلرک کو بنا دیا گیا ہے۔سفارشی ڈاکٹر برکی میں عمران خان کے کزن کے علاوہ کسی صلاحیت کے مالک نہیں۔ باچاخان مرکز پشاور میں
مختلف وفود سے گفتگو کرتے ہوئے ایمل ولی خان نے کہا کہ امریکا میں بیٹھ کر صوبے کے صحت کا نظام چلایا جارہا ہے، ایل آر ایچ میں کرونا سے سب سے زیادہ اموات رپورٹ ہوئیں۔کرونا کے نام پر اپوزیشن کو طعنہ دینے والا عمران خان اپنے کزن کا احتساب کب کرے گا؟ صوبے کے سب سے بڑے ہسپتال ایل آر ایچ میں سہولیات کا فقدان، برکی صاحب امریکا میں آرام فرمارہے ہیں۔آج پورے ہسپتال کا انتظام ایک کلرک چلا رہا ہے، تبدیلی سرکار نے آٹھ سال کے دوران صوبے کو دیوالیہ بنادیا ہے۔ ایمل ولی خان نے کہا کہ تبدیلی سرکار میں ہر جگہ اپنوں کو نوازا جارہا ہے، کہیں رشتہ دار تو کہیں دوستوں پر نوازشات کی بارشیں ہورہی ہیں۔تازہ مثال اپنے ہی وکیل دوست کو پی ٹی وی کا چیئرمین بنانا عوام کے سامنے ہے۔ایل آر ایچ میں کروڑوں کی کرپشن بھی سامنے آچکی ہے، نیب نے اس پر بھی چپ کا روزہ رکھا ہوا ہے۔ ان کا کہنا تھا کہ بلین ٹری سونامی پر سپریم کورٹ بھی برہم ہے لیکن نیب نے ابھی تک کسی حکومتی وزیر کے خلاف ریفرنس تک فائل نہیں کیا۔بی آر ٹی تو سفید ہاتھی بن چکا ہے، مالم جبہ سکینڈل کھولا گیا تو بہت سے وزیروں و مشیروں کے حقیقت کا پول کھل جائیگا۔ عوامی نیشنل پارٹی کے صوبائی صدر ایمل ولی خان نے کہا ہے کہ عمران خان کا کزن ڈاکٹر برکی صوبے کے صحت کے نظام کے ساتھ کھلواڑ کررہا ہے۔
