کراچی (این این آئی+ آن لائن)پاکستان پیپلز پارٹی کے شریک چیئرمین و سابق صدر آصف علی زرداری کی صاحبزادی بختاور بھٹو کی منگنی ہوگئی۔بختاور اور محمود چودھری نے ایک دوسرے کو انگوٹھی پہنائی، تقریب میں 100 سے 150 افراد
شریک ہوئے۔ سابق صدر آصف علی زرداری بھی تقریب میں شریک ہوئے، ڈاکٹروں کے مشورے سے آصف زرداری ہسپتال سے تقریب میں شرکت کے لیے گھر پہنچے تھے۔تقریب میں شریک محمود چودھری کے اہلخانہ کا وفد 12 سے15 افراد پر مشتمل تھا۔تقریب میں بحریہ ٹاؤن کے ملک ریاض حسین، فاروق ایچ نائیک بھی شریک ہوئے۔اس موقع پر سینیٹر شیری رحمان، انور مجید سمیت دیگر شخصیات بھی بلاول ہاوس میں موجود تھیں۔ پاکستان کے سابق صدر آصف علی زرداری کے صاحبزادی بختاور بھٹو زرداری کی گزشتہ روز منگنی محمود چوہدری کے ساتھ طے پا گئی۔ سوشل میڈیا پر تصاویر وائرل ہو گئیں۔ ملک بھر کے الیکٹرونک میڈیا اور سوشل میڈیا پر وائرل ہونے والی تصاویر میںبختاور بھٹو زرداری اپنے منگیتر محمود احمد چوہدری کو انگوٹھی پہنا رہی ہیں جبکہ محمود احمد چوہدری انہیں انگوٹھی پہنا رہے ہیں۔ اس موقع پر آصف علی زرداری مہمانوں سے مل رہے ہیں اور ان سے مبارکباد وصول کر رہے ہیں۔
