لاہور( این این آئی)پاکستان مسلم لیگ (ن) کی نائب صدر مریم نواز کی جاتی امراء رائے ونڈ سے روانگی سے قبل خصوصی دعا کرائی گئی ۔ مریم نواز نے دیگر کے ہمراہ اپنی والدہ بیگم کلثوم نواز ، اپنے دادا میاں محمد شریف اور چچا عباس شریف کی قبروں پرفاتحہ خوانی بھی کی ۔
مریم نواز کی گاڑی ان کے شوہر کیپٹن (ر) محمد صفدر نے ڈرائیو کی ۔دوسری جانب مسلم لیگ (ن) کے قائد نوازشریف اور مریم نواز کے ترجمان محمد زبیر نے کہا ہے کہ عمران خان نے کہا تھا کہ گھبرانا نہیں ہے، لیکن آج اِن کے گھبرانے کا وقت آگیا ہے۔محمد زبیر نے جاتی امرا میں میڈیا سے گفتگو کرتے ہوئے کہاکہ چاہے حکومت ٹی وی بند کردے ، سڑکیں بلاک کردے لیکن عوام مسلم لیگ (ن) کے قائد نوازشریف کو سننے کے لیے ضرور آئے گی۔محمد زبیر نے کہا کہ قوم عمران خان سے مت ڈرے ، ان کی حکومت جانے والی ہیں۔انہوںنے کہا کہ پولیس والے غیر قانونی احکامات کو مت مانے کیوں کہ یہ جعلی حکومت ہے۔انہوںنے کہاکہ جیلوں میں بھیجنے اور نا اہلی کے باوجود ہمارے ووٹ پی ٹی آئی سے زیادہ تھے۔اگر پی ٹی آئی رہنما جہانگیر ترین اپنا طیارہ لئے نہ پھرتا تو تحریک انصاف کو حکومت بنانا نا ممکن تھا۔انہوںنے کہاکہ کسی ایک شخص سے پوچھ لیں کہ اس کی زندگی آج زیادہ اچھی گزر رہی ہے یا اس سے پہلی حکومت میں تھی،اگر حکومت نے گڑبڑ کرنے کی کوشش کی تو ذمہ دار حکومت ہوگی۔
