کراچی(این این آئی)سندھ حکومت نے صوبے کے چند دیہی اضلاع میں عوام کو مرغیاں اور بکریاں پالنے کی ترکیب بتانے پر 37 کروڑ روپے صرف کردیئے۔حکومت کو خواتین کو مرغیوں اور بکریوں کی فراہمی پر 5 سالوں میں ڈیڑھ ارب روپے صرف کرنے تھے تاہم اس پیکیج میں

سے گزشتہ 27 ماہ میں صرف اس بات پر 37 کروڑ روپے خرچ کردیئے گئے کہ مرغیاں اور بکریاں کیسے پالی جائیں، اس آگاہی مہم پر 5 سالوں میں 33 کروڑ روپے صرف ہونے تھے لیکن تقریبا نصف عرصے میں ہی اس بجٹ سے 4 کروڑ روپے اضافی خرچ کردیئے گئے۔اس پیکیج کے تحت اب تک تقریبا 86 کروڑ روپے مالیت کی مرغیاں اور بکریاں تقسیم کی گئی ہیں تاہم یہ کام صوبے کے صرف 10 اضلاع میں ہی کیا جاسکا ہے۔اس حوالے سے ایک این جی او نے سندھ اینٹی کرپشن اور سندھ پبلک پروکیورمنٹ ریگولیڑی اتھارٹی کو درخواست دی ہے۔اینٹی کرپشن نے درخواست پر تفتیش شروع کی تاہم نامعلوم وجوہات کی بنا پر کیس کی فائل بند کردی گئی۔سندھ پبلک پروکیورمنٹ ریگولیڑی اتھارٹی نے اس مہم کو خلاف قانون قرار دے کر ملوث افسران کیخلاف کارروائی کی سفارش کی تھی۔درخواست گزار این جی او نے بتایاکہ اس نے اینٹی کرپشن کو ثبوت فراہم کردیے ہیں اور اس حوالے سے کارروائی کے منتظر ہیں۔

موضوعات:مرغیاں