راولپنڈی (مانیٹرنگ ڈیسک) موٹر وے پر خاتون کی عصمت دری کرنیوالے ملزمان کو سرعام پھانسی دی جائے، پھانسی کے مطالبے میں اضافہ ہو گیا ہے۔ اس افسوسناک واقعہ پر سوشل میڈیا پر خاتون سے پیش آنے والے افسوسناک واقعہ پر ان کے حق میں ٹاپ ٹرینڈ بن چکا ہے۔ ٹوئٹر سے لے کر انسٹاگرام تک تمام پلیٹ فارمز پر خاتون کے حق میں آواز اٹھائی جا رہی ہے اور صارفین کا ایک ہی
مطالبہ ہے کہ ان درندوں کو پھانسی کی سزا دی جائے۔ لوگوں نے تو شیریں مزاری کے خلاف بھی سوشل میڈیا پر بولناشروع کر دیا ہے، ایک صارف نے لکھا کہ انسانیت مر رہی ہے انسانی حقوق کی رکھوالی کرنے والے سو رہے ہیں جناب وزیراعظم صاحب براہ مہربانی یہ محترمہ شیریں مزاری اس وزارت کے اہل نہیں ہں ان سے یہ وزارت واپس لی جائے۔ ٹوئٹر پر ایک صارف نے کہا کہ نوٹس ہو گیا اب مجرم پکڑے جائیں گے عدالت پیش ہوں گے پہلے عبوری ضمانت ہو گی پھر کیس چلتا رہے گا چند سال بعد کیس ختم لوگ بھول جائیں گے پھر کوئی اور زیادتی کا کیس آئے گا اس پر ہم چند دن آواز اٹھائیں گے پھر وہی نوٹس وہی عدالت وہی ضمانت اور یہ نظام چل سو چل۔ غرض سوشل میڈیا پر ہر کوئی اپنے خیالات کا اظہار کر رہا ہے، زیادہ صارفین کا مطالبہ ان ملزمان کی سرعام پھانسی ہے ان کا کہنا ہے کہ اس عمل سے اس معاشرے میں ناسور کی طرح پھیلنے والی اس گندگی کا خاتمہ کیا جا سکتا ہے۔ ماضی میں بھی اس طرح کے کئی واقعات ہوئے ہیں، ایسے شرمناک واقعات نہ ہوں اس لئے ملزمان کی سرعام پھانسی کا مطالبہ زور پکڑتا جا رہا ہے۔ واضح رہے کہ وفاقی وزیر فیصل واوڈا نے کہا ہے کہ انتہائی دل دہلا دینے والاموٹر وے سانحہ،ایک اور حوا کی بیٹی کی عصمت دری۔ اپنے بیان میں وفاقی وزیر فیصل واوڈا نے کہاکہ ننھی مروہ اور اب یہ، میں وزیراعظم سے بھی مل رہا ہوں، مجرموں کے
خلاف سخت ترین کارروائی ہوگی- وفاقی وزیر فیصل واوڈا نے کہاکہ تمام پارلیمنٹرینز سے استداہے کہ خدارا ان درندوں کی سرعام پھانسی کی قانون سازی کے لئے ایک ہو۔
