اسلام آباد (این این آئی)وزیر ریلوے شیخ رشید احمد سے پاکستان میں چین کے سفیر یاؤ جِنگ نے ملاقات کی جس میں سی پیک فریم ورک کے تحت پاکستان کا تاریخ ساز ریل منصوبہ ایم ایل ون منظور ہونے پر مبارکباد دی۔ چینی سفیر نے کہاکہ ایم ایل ون ریل منصوبہ پاکستان اور چین کے درمیان تعلقات کو مزیدمضبوط کرے گا۔ شیخ رشید نے کہاکہ ایم ایل ون منصوبہ پاکستان میں جدید ریلوے کی طرف پہلا قدم ہے،پاکستان کو معاشی ترقی دے گا۔ شیخ رشید احمد نے کہا کہ ایم ایل ون منصوبہ موجودہ حکومت کا فلیگ شپ پروگرام ہے۔ پاکستانی تاریخ کا سب سے بڑا

ترقیاتی پروگرام ہے۔انہوں نے کہاکہ ایم ون پر 6.8 ارب امریکی ڈالر لاگت آئیگی۔ کراچی سے پشاور 1872 کلومیٹر تیز رفتار کا نیا ٹریک تعمیر ہوگا۔شیخ رشید احمد نے کہاکہ منصوبے سے ڈیڑھ لاکھ افراد کو بلواسطہ اور بلا واسطہ روزگار کے مواقع فراہم ہونگے۔ چینی سفیر نے کہاکہ ایم ایل ون منصوبہ پاکستان عوام کے لئے ایک عظیم منصوبہ ہے- پاکستان مین سفری انقلاب لائے گا۔ چینی سفیر نے کرونا بیماری پر جلد قابو پانے پر حکومت پاکستان اور ڈاکٹرز اور میڈیکل سٹاف کی تعریف کی۔ملاقات میں چیئرمین ریلوے حبیب الرحمن گیلانی بھی موجود تھے۔