اسلام آباد (مانیٹرنگ ڈیسک)لیگی ایم پی اے اشرف انصاری پی ٹی آئی کی تقریب میں پہنچ گئے ، لیگی ایم پی اے کو دیکھ کر حاضرین حیران رہ گئے ، اشرف انصاری نے کہا مسلم لیگ ن کے ٹکٹ پر منتخب ہو، عمران خان کے اچھے اقدام پر ان کا ساتھ دوں گا ۔ قومی موقر نامے میں شائع رپورٹ کے مطابق

لیگی ایم پی اے کا مزید کہنا تھا کہ اقوام متحدہ میں تقریر کے بعد عمران خاں کیساتھ کھڑے ہیں ، اخلاقی جرات کا مظاہرہ کرتے ہوئے عمران خان کا ساتھ دیا ، عمران خان اپنے نظریے سے ہٹ گئے تو ساتھ چھوڑ دیں گے ، تحریک انصاف کے رہنما عثمان ڈار نے لیگی ایم پی اے کو ٹائیگرز فورس کی جیکٹ اور کیپ پہنائی ۔ قبل ازیں مسلم لیگ (ن) کے 6 ارکان پنجاب اسمبلی قیادت کی اجازت کے بغیر وزیراعلیٰ پنجاب سے ملنے پہنچ گئے۔لیگی رہنما عظمیٰ بخاری نے ارکان کی وزیراعلیٰ پنجاب سے ملاقات کی تصدیق کرتے ہوئے کہا کہ ہمارے 6 ارکان اسمبلی وزیراعلی سے ملے اور انہوں نے یہ ملاقات پارٹی قیادت کی اجازت کے بغیر کی ہے۔عظمیٰ بخاری نے کہا کہ پیپلزپارٹی کا بھی ایک رکن وزیراعلی پنجاب سے ملاہے، ہم نے اپنے ارکان کے خلاف کارروائی کے لیے قیادت کو سفارش کردی ہے۔دوسری جانب وزیراعلیٰ پنجاب عثمان بزدار سے ملاقات کرنے والوں میں (ن) لیگ کے میاں جلیل احمد شرقپوری، چوہدری اشرف علی انصاری، نشاط احمد ڈاہا ، غیاث الدین، اظہر عباس اور محمد فیصل خان نیازی شامل ہیں جب کہ پیپلز پارٹی کے رکن پنجاب اسمبلی غضنفر علی بھی وزیراعلیٰ سے ملے۔