لاہور( این این آئی )لاہور ہائیکورٹ نے منی لانڈرنگ کیس میں مسلم لیگ (ن) کے صدر و قائد حزب اختلاف محمد شہباز شریف کی عبوری ضمانت میں 16جولائی تک توسیع دیدی ۔لاہور ہائیکورٹ میں آمدن سے زائد اثاثوں میں شہباز شریف کی عبوری ضمانت کی درخواست پر سماعت ہوئی ۔ فاضل عدالت نے استفسار کیا کہ شہباز شریف کی کورونا کی رپورٹ تو منفی آ گئی پھر وہ کیوں نہیں حاضر ہوئے۔شہباز شریف کے وکیل نے عدالت کو آگاہ کیا کہ طبی ماہرین کے مطابق کورونا

کی دو رپورٹس منفی آئیں تو مریض کو صحتیاب سمجھا جاتا ہے۔ شہباز شریف کی ٹیسٹ رپورٹ تو منفی ہے لیکن ان میں ابھی بھی کورونا کی علامات ہیں، صحت مکمل ٹھیک نہیں ہے۔ شہباز شریف کے وکیل نے عبوری ضمانت میں تین ہفتوں کی توسیع کی استدعا کی۔ عدالت نے کہا کہ آج حاضری سے بھی استثنیٰ کی درخواست منظور کر لی ہے ۔مزید دلائل سننے کے بعد عدالت نے شہباز شریف کی عبوری ضمانت میں 16 جولائی تک توسیع کرتے ہوئے سماعت ملتوی کر دی۔