اسلام آباد (آن لائن) کورونا کے مریضوں کے ٹیسٹوں کے حوالے سے پالیسی میں تبدیلی کا امکان ظاہر کیا جا رہا ہے۔کورونا کے مریضوں کے ٹیسٹ کم سے کم کروانے کا جلد فیصلہ ہونے کا امکان ہے۔کورونا ایڈوائزری گروپ مریض کے ایک دفعہ ٹیسٹ کروانے پر فیصلہ کرے گا۔ممبر ایڈوائزری گروپ پروفیسر اسد اسلم نے کہا ہے کہ 14 دن بعد سنجیدہ علامات نہ رکھنے والے مریض کو اسپتال سے فارغ کر دیا جائے گا۔
انہوں نے کہا کہ کورونا کے صحتمند مریضوں کے لیے دو نیگیٹو ٹیسٹ کی پالیسی پر نظرِ ثانی کر رہے ہیں۔خیال رہے کہ پاکستان میں کورونا کیسز پہلی بار 5 ہزار سے تجاوز کر گئے۔کورونا کے وار تیزی سے جاری ہیں۔گزشتہ 24 گھنٹوں کے دوران 5 ہزار 385 نئے کورونا کیس رپورٹ ہوئے ہیں۔ملک میں کورونا کیسز کی تعداد ایک لاکھ 13 ہزار 702 تک جا پہنچی ہے۔جب کہ مہلک وائرس نے ایک ہی دن میں 83 افراد کی جان لے لی ہے۔گذشتہ روز جاری کی گئی رپورٹ میں بتایا گیا کہ این سی او سی کے مطابق پنجاب میں کورونا وائرس کے کیسز کی تعداد سب سے زیادہ 40 ہزار 819 تک پہنچ گئی ہے۔ سندھ میں 39 ہزار 555 کورونا کیسز رپورٹ ہوئے، خیبرپختونخوا میں کیسز کی تعداد 14 ہزار 006 اور اسلام آباد میں 5785 ہو گئی۔ بلوچستان میں 6788، گلگت بلتستان میں 952 کیسز رپورٹ ہوئے۔ آزاد کشمیر میں کورونا وائرس کیسز کی تعداد 412 ہو گئی۔ملک بھر میں اب تک 35,018 مریض مکمل طور پرصحت یاب ہو گئے۔ این سی او سی کے مطابق گزشتہ 24 گھنٹوں میں 105 اموات ہوئی ہیں۔کورونا وائرس سے موت کے منہ میں جانے والے افراد کی تعداد 2172 تک پہنچ گئی جن میں سندھ میں 679، پنجاب میں 773، کے پی کے میں 587، گلگت بلتستان 14، ا?زاد کشمیر میں 9، اسلام آباد میں 52 اور بلوچستان میں 58 شامل ہیں۔
