اسلام آباد (این این آئی)پاکستان پیپلزپارٹی کے راہنما رکن قومی اسمبلی عبدالقادر پٹیل نے مراد سعید اور شہزاد اکبر کے بیانات کا ردعمل کا اظہار کرتے ہوئے کہا ہے کہ شہزاد اکبر، سیف الرحمان بننے کی کوشش میں ایکسپوڑڈ ہوچکے ہیں۔ اپنے بیان میں قادر پٹیل نے کہاکہ صدر آصف زرداری نے اپنی پوری زندگی احتساب کے نام پر انتقام کا سامنا کیا، عوام دشمن قوتوں سے سمجھوتہ نہ کرنے پر صدر آصف زرداری کو انتقام کا نشانہ بنایا گیا، پی ٹی آئی حکومت نیب کے ذریعے صرف اپوزیشن کے
افراد کو نشانہ بنارہی ہے۔قادر پٹیل نے کہاکہ عمران خان نے مراد سعید جیسے آلہ کار پالے ہوئے ہیں جنہوں نے نیویارک میں اسمارٹ لاک ڈاؤن کرادیا۔قادر پٹیل نے کہاکہ وزیراعظم کی پوزیشن اتنی کمزور ہے کہ ایک گھنٹے میں تین پرچے پاس کرنے والے مراد سعید کے پیچھے چھپنے پر مجبور ہیں، سندھ وہ واحد صوبہ ہے کہ جہاں لاک ڈاؤن کے دوران مستحقین کو گھروں کی دہلیز پر راشن پہنچایا گیا، پی ٹی آئی حکومت جواب دے کہ کرونا وائرس کے نام پر عالمی اداروں سے آنے والی فنڈنگ کہاں گئی؟ ۔
