لاہور (آن لائن) ترجمان پنجاب حکومت مسرت جمشید چیمہ نے کہا ہے کہ بلاول زرداری پنجاب کیلئے فکرمندہونے کی بجائے سندھ کے حالات پر توجہ مرکوز کریں،(ن)لیگ اور پیپلز پارٹی کی بلا جواز تنقید مالی امداد میں کرپشن کا موقع نہ ملنے پران کی بے چینی کو ظاہر کرتی ہے ،اپوزیشن منفی پراپیگنڈے سے طبی عملے کو متنفرنہیں کر سکتی،پنجاب کے 15اضلاع میں کورونا وائرس کے کیسز نہ ہونے کے برابر ہیں ،
جن اضلاع میں پھیلائو زیادہ ہے وہاں رینڈم ٹیسٹنگ کر رہے ہیں اور جہاں پھیلائو حد سے زیادہ ہے وہاں علاقے بھی سیل کئے گئے ہیں۔ان خیالات کا اظہار انہوں نے اپنی رہائشگاہ پر پارٹی کی خواتین رہنمائوں سے گفتگو اور میڈیا کیلئے جاری کئے گئے بیان میں کیا ۔ ترجمان پنجاب حکومت مسرت جمشید چیمہ نے کہا کہ وفاق تمام صوبوں کو بلا تفریق مساوی سامان فراہم کر رہا ہے لیکن سندھ کی جانب سے صرف سیاسی مخالفت میں واویلا کیا جارہا ہے جو موجودہ حالات میں قومی وحدت کیلئے نقصان کا باعث ہے ۔ انہوںنے کہا کہ بلاول بھٹو قرنطینہ سے باہر آنے کے بعد پنجاب کیلئے فکر مند دکھائی دئیے ہیںلیکن مشورہ ہے کہ وہ پنجاب کی بجائے سندھ کے حالات پر توجہ دیں ۔ پنجاب میں وزیر اعلیٰ سردار عثمان بزدار کوروناوائرس کے پھیلائو کو روکنے ، مریضوںکو علاج معالجے کی سہولیات اور کمزور طبقات کوریلیف دینے کیلئے دن رات کوشاں ہیں ۔ انہوںنے کہا کہ شہباز شریف کا یہ بیان مضحکہ خیز ہے کہ (ن) لیگ کے شیر میدان عمل میںہیں حالانکہ سچ یہ ہے کہ (ن) لیگ چوری کھانے والی جماعت ہے اور مشکل وقت میں عوام کو (ن) لیگ کے کاغذی شیر کہیں بھی نظر نہیں آئے۔ اتحاد کے موقع پر نفاق ڈالنے والوںکے چہرے بے نقاب ہو گئے یں۔ترجمان پنجاب حکومت مسرت جمشید چیمہ نے کہا کہ سندھ حکومت اپنی ناکامیوں کی ذمہ داری وفاق پر ڈال رہی ہے اورپریس کانفرنسز میں رونا دھونا کیا جارہا ہے جبکہ پنجاب حکومت پوری تندہی کے ساتھ اپنا کام کر رہی ہے۔
