اسلام آباد (این این آئی) ضلعی انتظامیہ اسلام آباد نے کورونا وائرس کے کیسز سامنے آنے کے بعد شاہ اللہ دتہ اور اس سے ملحقہ آبادی کو سیل کر دیا ہے۔ڈی سی اسلام آباد کی جانب سے جاری اعلامیے میں کہا گیا کہ ضلعی محکمہ صحت کے مشورے پر علاقے کو سیل کرنے کا فیصلہ کیا جبکہ محکمہ صحت کی ٹیموں نے متاثرہ جگہ کا دورہ کیا اور اسپرے بھی کیا گیا۔ اعلامیے کے

مطابق شاہ اللہ دتہ کے داخلی اور خارجی راستوں پر پولیس اور رینجرز کے اہلکاروں کو بھی تعینات کر دیا گیا۔یاد رہے کہ وفاقی دارالحکومت میں ایک ہی گھر کے سات افراد میں کورونا وائرس کی تشخیص ہوئی ہے۔ڈپٹی کمشنر (ڈی سی) اسلام آباد حمزہ شفقات کا کہنا ہے کہ ایف 7 مرکز میں رہائش پذیر ایک ہی خاندان کے 7 افراد کے کورونا ٹیسٹ کا نتیجہ مثبت آیا۔