اسلام آباد(مانیٹرنگ ڈیسک)لاک ڈاؤن کےدوران ڈبل سواری پرپابندی کی وجہ سےتین گھنٹےکانومولود اپنی جان کی بازی ہارگیا۔تفصیلات کے مطابق وزیر آباد کے محلہ محمد نگر کا رہائشی ساغر علی تین گھنٹے کے نومولود بچے کی طبیعت خراب ہونے پر بھائی کیساتھ ہسپتال روانہ ہوا جسے اوررہیڈ برج کے قریب پولیس اہلکاروں نے ڈبل سواری پر روک لیا۔ساغر علی نے پولیس اپنی مجبوری سے آگاہ کیا ۔
لیکن پولیس اہلکاروں نے کہا کہ ہم خود ڈاکٹر ہیں اور انہیں زبردستی پولیس وین میں ڈال کرپورے شہر کا چکر لگوا یا اور تھانے لے جا کر نومولود بچے سمیت حوالات میں بند کر دیا۔ساغر نے پولیس والوں کی منتیں ترلے کیں مگر سنگدل پولیس ملازمین مذاق اڑاتے رہے۔جس کے بعد ساغر علی نے اپنے گھر فون کر کے اپنی بیوی اور دوسرے بھائی کو بلایا اور وہ بچے کو ہسپتال لے کر پہنچے تو ڈاکٹر نے بتایا کہ بر وقت آکسیجن نہ ملنے سے بچہ زندگی کی بازی ہارچکا تھا ۔جس پر گھر میں گہرام مچ گیا اور مشتعل لوگوں نے تھانے کا گھیراؤ کرلیا ۔ بعدازاں پولیس نے ساغر علی کو شخصی ضمانت پر چھوڑدیا۔دوسری جانب کراچی میں ڈبل سواری پر پابندی کے دوران خواتین کو موٹر سائیکل پر سفر کی اجازت مل گئی۔محکمہ داخلہ سندھ نے کورونا کے باعث صوبے بھر میں کیے گئے لاک ڈاؤن پر سختی سے عمل درآمد کروانے کے لیے چند روز قبل موٹر سائیکل کی ڈبل سواری پر مکمل پابندی عائد کر دی تھی۔عام حالات میں خواتین، برزگ ، بچوں اور صحافیوں کو موٹر سائیکل کی ڈبل سواری پر پابندی سے استثنیٰ حاصل ہوتا ہے تاہم اس بار صوبائی حکومت نے خواتین سمیت تمام افراد پر موٹر سائیکل کی ڈبل سواری پر پابندی عائد کر دی تھی۔اب اطلاعات ہیں کہ کراچی میں خواتین کو موٹر سائیکل پر سفر کی اجازت دیدی ہے تاہم خواتین سے باہر نکلنے کا جواز پوچھ کر انھیں جانے دیا جائے گا۔
