اسلام آباد (این این آئی)اسلام آباد کے پمز ہسپتال کے آئسولیشن وارڈ کے باہر اب تک 5 اموات ہوچکی ہیں۔ نجی ٹی وی کے مطابق ہسپتال ذرائع نے بتایاکہ مرنے والے 5 مریضوں کی عمریں مختلف تھیں اور وہ کورونا وائرس کے سوا دیگر امراض میں مبتلا تھے۔
ہسپتال ذرائع کے مطابق سی ٹی اسکین کے سوا دیگر امراض کے شکار کورونا مریض آئسولیشن وارڈ میں ہی داخل ہیں ، اسی وارڈ میں کورونا کے ایک مثبت مریض کا ڈائلیسز ہوا۔ہسپتال ذرائع کے مطابق عارضہ قلب، گردوں، پھیپھڑوں، نمونیہ کے مریض آئسولیشن وارڈ میں بھیج دینے پر حکام نے تشویش کا اظہار کیا ہے۔ہسپتال ذرائع کے مطابق این آئی ایچ سے رپورٹ تین یا چار دن بعد موصول ہوتی ہے، رپورٹ ملنے کے دوران مریض کی موت اور تدفین بھی ہو چکی ہوتی ہے۔ہسپتال ذرائع کے مطابق آئسولیشن وارڈ میں 16 افراد زیر علاج ہیں ، ایک وینٹی لیٹر پر ہے۔ای ڈی پمز ڈاکٹر انصر نے کہا کہ تمام وارڈز میں 2 ، 2 کمرے کورونا کے شبہ میں افراد کے لیے مختص ہیں، کورونا رجسٹریشن سینٹر پر مکمل چیک اپ کے بعد ہی آئسولیشن وارڈ بھیجا جاتا ہے۔این آئی ایچ حکام کے مطابق فلائٹس اور کورونا کے لوکل پھیلاو بعد این آئی ایچ پر لوڈ بہت زیادہ ہے، روزانہ سیمپل کی تعداد بڑھ رہی ہے، اسی ترتیب سے صلاحیت بھی بڑھا رہے ہیں۔
