لاہور( این این آئی )صوبائی دارالحکومت میں  بیشتر علاقوں میں آٹا نایاب رہا جس کے باعث لوگوں کو پریشانی کم نہ ہو سکی ،بعض علاقوں میں دکاندار آٹے کی قلت کا ناجائز فائدہ اٹھاتے ہوئے مقررہ نرخوں سے زائد پر فروخت کر تے رہے۔ پاکستان فلورملز ایسوسی ایشن کے چیئرمین عاصم رضا احمد نے پنجاب کی فلور ملز کوسندھ سے جاری ہونے والی گندم روک لئے جانے پر گہری تشویش کا اظہار کرتے ہوئے پنجاب میں آٹا بحران بڑھنے کا خدشہ ظاہر کیا ہے ۔

انہوں نے کہا کہ محکمہ خوراک سندھ کی جانب سے پرمٹ کے اجرا ء کے باوجود پنجاب کو آنے والے گندم کے ٹرکوں کو سندھ میں ہی روک لیا گیا ہے،10فلور ملز کی گندم لاڑکانہ میں روک لی گئی ہے۔جن میں لاہور کی 7فلور ملز کی گاڑیاں بھی شامل ہیں۔انہوںنے کہا کہ گندم کی نقل و حمل کے پرمٹس ہونے کے باوجود گاڑیوں کو پنجاب نہیں آنے دیاجارہا،سپلائی روکنے سے پنجاب میں آٹے کی قلت برقرار رہے گی۔

موضوعات:آٹا