کراچی (این این آئی) جمعیت اہلحدیث پاکستان کے چیف آرگنائزر مولانا محمد یوسف سلفی اور دیگر رہنما جن میں مولانا اخترمحمدی، مولانا بلال احمد سلفی، مولانا عبد الرحمن محمدی ، مولانا ثناء اللہ سلفی،اہلحدیث یوتھ فورس کے ناظم حافظ محمد حنیف سلفی اور زاہد علی، جمعیت طلباء اہلحدیث کے ناظم محمد جمیل یزدانی، رضوان خان اور مشتاق احمد نے اپنے ایک مشترکہ بیان میں حکومت سندھ کی طرف سے مساجد کی بندش اور جمعتہ المبارک کے اجتماعات پر پابندی پر تشویش کا اظہار کرتے ہوئے کہا ہے کہ
حکومت کا یہ عمل اللہ تعالیٰ کی مزید ناراضگی کا سبب بنے گا لہذا اسے فوری ختم کیا جائے ۔ انہوں نے کہا کہ مساجد اللہ کے گھر پاک و صاف اور مقدس ہیں اور مسجدوں میں آنے والے لوگ باوضو ہونے کے بعد ان سے ہر قسم کے گناہ جھڑ جاتے ہیں لہذا انہیں پابند سلاسل نہ کیا جائے۔ انہوں نے مزید کہا کہ ایک تبلیغی جماعت کے لوگوں کو نشانہ بنا کر ایک خاص مکتبہ فکر کے لوگوں کو نوازا جا رہا ہے ۔ انہوں نے مطالبہ کیا کہ ایران سے آنے والے تمام زائرین کو قرنطینہ منتقل کیا جائے ۔
