اسلام آباد(این این آئی)مشیر خزانہ ڈاکٹر عبدالحفیظ شیخ نے کہا ہے کہ کورونا وائرس کی روک تھام کیلئے حکومت آئی ایم ایف سے اہم رعایت حاصل کرنے میں کامیاب ہوگئی ،کورونا وائرس پر اٹھنے والے اخراجات مالی خسارے میں شامل نہیں ہونگے۔

پیر کو یہاں میڈیا سے بات چیت کرتے ہوئے مشیر خزانہ نے کہاکہ کورونا وائرس کی روک تھام کیلئے حکومت آئی ایم ایف سے اہم رعایت حاصل کرنے میں کامیاب ہوگئی ،کورونا وائرس پر اٹھنے والے اخراجات مالی خسارے میں شامل نہیں ہونگے۔مشیر خزانہ نے کہاکہ آئی ایم ایف کورونا سے نمٹنے کیلئے اضافی اخراجات خسارے میں شامل نہ کرنے پر رضامند ہے، وزیراعظم نے کورونا وائرس کے معاشی اثرات سے نمٹنے کی حکمت عملی کی زمہ داری سونپ دی۔ عبدالحفیظ شیخ نے کہاکہ ایسی حکمت عملی وضع کریں گے کہ معاشی سرگرمیاں متاثر نہ ہوں، کوشش ہوگی اشیائے خوردونوش کی قلت یا قیمتوں میں اضافہ نہ ہو۔مشیر خزانہ نے کہاکہ کوشش ہے کہ کورونا وائرس کے باعث بے روزگاری کا خطرہ پیدا نہ ہو، کسانوں کو بھی ان کی مصنوعات کا پورا معاوضہ ملتا رہے۔ انہوںنے کہاکہ برآمدات متاثر ہونے کا خدشہ ہوا تو معائدوں میں توسیع کی کوشش کریں گے، پاکستان کی اسٹاک مارکیٹ صرف دس سے گیارہ فیصد گری ہے، دنیا کی اسٹاک مارکیٹوں میں 1 ٹریلین ڈالر کی مندی آئی ہے۔مشیر خزانہ نے کہاکہ کورونا کی روک تھام کیلئے مختلف ممالک اور عالمی مالیاتی اداروں سے مالی و تکنیکی مدد لیں گے، جو ملک اس صورت حال سے نکل رہے ہیں ان سے بھی مدد لی جاسکتی ہے۔