لاہور( این این آئی)لاہور ہائیکورٹ نے اورنج لائن ٹرین منصوبے کے نام پر درختوں کی کٹائی کے خلاف دائر درخواست پر ٹرین کیلئے ٹرانسمیشن لائن بچھانے سے روکنے کے حکم امتناعی میں 6مارچ تک توسیع کرتے ہوئے ڈی جی پی ایچ اے کے پیش نہ ہونے پر سخت برہمی کا اظہار کیا ۔

لاہور ہائیکورٹ کے چیف جسٹس مامون رشید شیخ نے درخواست پر سماعت کی ۔ دوران سماعت چیف جسٹس نے اپنے ریمارکس میں کہا کہ افسرقوانین سے آگاہ ہیں پھربھی کمروں میں بیٹھ کردرخت کاٹنے کاحکم دے کر قانون کونظراندازکرتے ہیں ۔ فاضل عدالت نے ڈی جی پی ایچ کے پیش نہ ہونے پر سخت برہمی کا اظہارکرتے ہوئے کہا کہ پیش نہ ہونے پرکیوں نہ ڈی جی پی ایچ اے کے وارنٹ گرفتاری جاری کردیئے جائیں۔ دوران سماعت محکمہ ماحولیات کے وکیل نے موقف اپنایا کہ اورنج لائن ٹرین منصوبے کیلئے بلااجازت درخت کاٹنے پرلاہور الیکٹر ک سپلائی کمپنی کوشوکاز نوٹس بھجوا دیا ہے ،قانونی طریق کار نظر انداز کرنے پرمحکمہ جنگلات اور پی ایچ اے کوبھی شوکاز بھجوا گیا ہے ۔ چیف جسٹس مامون رشید شیخ نے تینوں محکموں کو شوکاز نوٹس کا جواب دینے کیلئے محکمہ ماحولیات کے پاس پیش ہونے کا حکم دیتے ہوئے مزید سماعت 6مارچ تک ملتوی کر دی ۔

موضوعات:اورنج لائن ٹرین