سکھر(این این آئی) صوبہ سندھ میں روہڑی ریلوے پھاٹک پر مسافر کوچ ٹرین کی زد میں آگئی جس کے نتیجے میں 20 افراد جاں بحق جبکہ درجنوں زخمی ہوگئے۔ تفصیلات کے مطابق روہڑی ریلوے پھاٹک پر افسوس ناک واقعہ پیش آیا ہے، مسافر کوچ ٹرین کی زد میں آگئی، حادثے میں 20 افراد جان کی بازی ہار گئے جبکہ 30 سے زائد افراد زخمی ہوگئے۔ پولیس حکام نے بتایا کہ حادثے میں زخمی ہونے والے افراد کو اسپتال منتقل کیا جا رہا ہے جہاں انہیں طبی امداد دی جائے گی۔ریسکیو حکام کے مطابق روہڑی کے قریب کندھرا پھاٹک پر مسافروں سے
بھری بس کراچی سے راولپنڈی جانیوالے پاکستان ایکسپریس کی زد میں آگئی، واقعے میں کم از کم 20 افراد جاں بحق اور درجنوں زخمی ہوگئے۔ریسکیو ورکرز کے مطابق اندھیرا ہونے کے باعث امدادی کاموں میں مشکلات کا سامنا ہے، لاشوں اور زخمیوں کو تعلقہ اسپتال منتقل کیا جارہا ہے، کئی زخمیوں کی حالت تشویشناک ہے، ہلاکتوں میں اضافے کا بھی خدشہ ہے۔عینی شاہدین کے مطابق ٹریفک جام ہونے کے باعث ڈرائیور بس کو لنک روڈ پر لے آیا تھا، جہاں ریلوے پھاٹک ہر وقت کھلا رہتا ہے، جس کے باعث حادثہ پیش آیا۔خیال رہے کہ گزشتہ ماہ 26 جنوری کو سندھ کے شہر خیرپور میں واری گوٹھ کے مقام پر برنس ایکسپریس کی 6 بوگیاں ٹریک سے اترگئی تھیں۔ ٹرین کے پٹری سے اترنے کے حادثے کے باعث 500 میٹر تک ٹریک کو نقصان پہنچا تھا۔یاد رہے کہ گزشتہ سال اکتوبر میں صوبہ پنجاب کے شہر لیاقت پور کے قریب تیز گام ٹرین کی 3 بوگیوں میں آگ لگ گئی تھی جس کے نتیجے میں 74 افراد جاں بحق ہوگئے تھے۔