لاہور( این این آئی)پیپلز پارٹی کے پنجاب اسمبلی میں پارلیمانی لیڈر سید حسن مرتضیٰ نے کہا ہے کہ ابھی تو صرف ریلوے میں نوکریاں فروخت کرنے کا الزام سامنے آیا ہے ،شیخ رشید صاحب نہ جانے کیا کیا فروخت کردیں گے ،شیخ رشید نے ہمیشہ کشکول میں وزرات حاصل کی ہے ، وہ ہر بار اپنے محکمہ میں خرید و فروخت کا بازار لگاتے ہیں،شیخ رشید نے ہمیشہ سرکاری وسائل پر ہاتھ صاف کیا ہے۔ اپنے بیان میں انہوںنے کہا کہ یوٹیلٹی سٹورز پر اشیا ء کی عدم فراہمی پر
ذمہ داروں کو مستعفی ہوجانا چاہیے لیکن یہاں تو کوئی مستعفی نہیں ہوتا ، ہر حکومتی رہنما اپنے مفاد کی تکمیل کے لئے میدان میں نکل آیا ہے ، حکومتی رہنمائوں کو علم ہے کہ ان کے اقتدار کا وقت تھوڑا ہے اس لئے لوٹ مار میں تیزی آگئی ہے ، عوام کی کسی کو پروا نہیں ہے، وزراء ایک دوسرے پر الزام لگانے میںمصروف ہیں، الزام تراشی کاطوفان بپا ہے ، جس کو حصہ نہیں مل رہا وہ دوسرے پر الزام لگا رہا ہے اور جس کو حصہ مل گیا ہے وہ مزید حصہ کے حصول میں بھاگ دوڑ کررہا ہے ۔
