مظفرآباد(این این آئی)وزیراعظم آزادحکومت ریاست جموں وکشمیر راجہ محمدفاروق حیدر خان نے وزیراعظم پاکستان عمران خان سے 08اکتوبر 2005ء کے زلزلہ متاثرہ تعلیمی اداروں،صحت عامہ کے ایرا کونسل کی جانب سے منظور شدہ منصوبوں کی تکمیل کیلئے 42ارب روپے فراہمی کا تحریر ی مطالبہ کردیا،وزیراعظم آزادکشمیر راجہ محمدفاروق حیدرخان نے وزیراعظم پاکستان کے نام لکھے خط میں کہا ہے کہ

آٹھ اکتوبر 2005ء کے تباہ کُن زلزلہ میں قیمتی انسانی جانوں اوراملاک کے نقصان کے بعد عالمی برادری نے انسانی ہمدردی کی بنیاد پر زلزلہ متاثرین کی بحالی اورتعمیر نو کے لئے بھرپور مالی معاونت کی،حکومت پاکستان کی جانب سے زلزلہ متاثرہ علاقوں میں 2192منصوبوں کی تکمیل کیلئے 42ارب روپے کی رقم درکار ہے،حکومت پاکستان کی مالی معاونت سے شروع کئے گئے 1297منصوبے تکمیل کے مختلف مراحل میں ہیں،جبکہ 895منصوبوں پر تعمیراتی کام فنڈز کی عدم دستیابی کے باعث شروع نہیں کیا جاسکا، ان منصوبوں میں تعلیم،صحت اورگورننس کے منصوبے شامل ہیں،وزیراعظم آزادکشمیر راجہ محمدفاروق حیدر خان نے اپنے ایک مکتوب (نمبر PMS/PS/119/2020مورخہ 08جنوری 2020ء)میں کہا ہے کہ ایراء کونسل نے ان منصوبوں کی باقاعدہ منظوری دے رکھی ہے جبکہ وفاقی کابینہ کی جانب سے ایراء کو نیشنل ڈیزاسٹر مینجمنٹ اتھارٹی میں ضم کرنے کے فیصلے میں ان منصوبوں کی تکمیل کے لئے درکار فنڈز کے بارے میں کوئی حتمی فیصلہ نہیں کیا گیا،انہوں نے وزیراعظم پاکستان عمران خان سے مطالبہ کیا کہ فوری طور پر ان منصوبوں کی تکمیل کیلئے 42ارب روپے کی رقم مہیا کی جائے تاکہ منظورشدہ منصوبوں کی تکمیل ممکن ہوسکے۔