ریاض(آن لائن)سعودی عرب میں نئے ہجری سال کے عمرہ سیزن کا آغاز یکم محرم الحرام سے ہو گیا ہے۔ جس کے بعد اب تک لاکھوں زائرین عمرہ کی سعادت حاصل کر چکے ہیں۔ سعودی محکمہ شماریات کی جانب سے بتایا گیا ہے کہ رواں سال کی طرح اس عمرہ سیزن میں بھی اب تک عمرہ کی غرض سے آنے والوں میں پاکستانیوں کی گنتی سرفہرست ہے۔ محکمہ شماریات کے مطابق 14 جمادی الاول 1441ھ (9 جنوری 2020) تک دنیا بھر سے کلمہ گو افراد کو مجموعی طور پر 27 لاکھ 16 ہزار 858 ویزوں کا اجرا کیا گیا ہے۔
جن میں سے اب تک 24 لاکھ 12 ہزار 572 افراد عمرہ ادا کرنے سعودی عرب آ چکے ہیں۔ جبکہ عمرہ کی سعادت حاصل کرکے وطن واپس لوٹ جانے والوں کی گنتی 20 لاکھ 37 ہزار 631ہو چکی ہے۔ اس بار بھی پاکستانی زائرین ہی عمرہ کی ادائیگی میں سرفہرست ہیں۔محکمہ شماریات کے مطابق اب تک 5 لاکھ 68 ہزار 536پاکستانی عمرہ کی سعادت حاصل کر چکے ہیں۔ اس فہرست میں انڈونیشیا کے زائرین دوسرے نمبر پر ہیں جن کی گنتی انڈونیشیا سے آنے والوں کی تعداد 5 لاکھ 5 ہزار 217 ہے۔جبکہ بھارتی زائرین 2 لاکھ92 ہزار 822 کے ساتھ تیسرے نمبر پر ہیں۔چوتھا نمبر مصر کے زائرین کا ہے جہاں سے اب تک 1 لاکھ 37 ہزار 834معتمرین آ چکے ہیں۔ معتمرین کی اس فہرست میں ملائیشیا پانچویں، ترکی چھٹے اور بنگلہ دیش ساتویں نمبر پر ہے۔وزارت حج و عمرہ کے مطابق سب سے زیادہ معتمرین ہوائی جہازوں کے ذریعے مملکت پہنچے ہیں جن کی گنتی22 لاکھ 72ہزار 163ہے، زمینی راستے سے آنے والوں کی گنتی1لاکھ 20 ہزارسے زائد جبکہ بحری سفر کے ذریعے اب تک 4 ہزار سے زائد افراد عمرے کی خاطر سعودی عرب آئے ہیں۔واضح رہے کہ کہ گزشتہ عمرہ سیزن میں سعودی عرب میں عمرے کی غرض سے سب سے زیادہ زائرین پاکستان آئے تھے۔ جن کی گنتی 16 لاکھ سے زائد ریکارڈ کی گئی۔ رواں سال بھی عمرہ کی غرض سے سب سے زیادہ زائرین پاکستان سے ہی آنے کا امکان ہے۔کیونکہ سعودی حکومت نے پاکستانیوں کے لیے عمرے کے کوٹے میں 18 فیصد کا اضافہ کر دیا گیا ہے، جس کے باعث مزید لاکھوں پاکستانی عمرے کی سعادت حاصل کرنے میں کامیاب ہو جائیں گے۔سعودی وزارت حج وعمرہ کے میڈیا ایڈوائزر ایمن العرفج کے مطابق گذشتہ بدھ کے روز سے مملکت کے بیرون سے آنے والے معتمرین پر جامع انشورنس پروگرام کے اطلاق کا آغاز ہو گیا۔
