کراچی (این این آئی) سپریم کورٹ کراچی رجسٹری میں ایئرپورٹس پر عدم سہولیات اور مسافر وں سے ناروا سلوک سے متعلق کیس کی سماعت،، چیف جسٹس کی ایڈیشنل ڈی جی سول ایوی ایشن تنویر اشرف کی سرزنش، عدالت نے ڈی جی سول ایوی ایشن کو تفصیلی رپورٹ دو ہفتے میں پیش کرنے کا حکم دے دیا۔
جمعہ کو سپریم کورٹ کراچی رجسٹری میں ایئرپورٹس پر عدم سہولیات اور مسافر وں سے ناروا سلوک کیس میں ایڈیشنل ڈی جی سول ایوی ایشن تنویر اشرف چیف جسٹس کے حکم پر عدالت میں پیش ہوئے،چیف جسٹس نے ان کی سرزنش کرتے ہوئے ریمارکس دیے کہ آپ کو عدالتی حکم کا نہیں معلوم تو آپ کرکیا کررہے ہیں، صرف دفتر میں بیٹھ کر گدی گرم کررہے ہیں اور چپراسی کو بھیج دیتے ہیں، سپریم کورٹ نے فلائٹ میں تاخیر اور مسافروں کو معاوضے کی ادائیگی کی ایک سال کی رپورٹ طلب کرلی جبکہ ایئر پورٹس کی سیکیورٹی اور منٹیننس سے متعلق بھی تفصیلی رپورٹ بھی پیش کرنے کا حکم دے دیا۔چیف جسٹس نے ریمارکس دیے کہ ریکارڈنگ اس لیے نہیں کرتے کیوں کہ ڈیل کی جاتی ہے مسافروں کا کیا حال کردیتے ہیں پروازیں لیٹ ہوتی ہیں تو لوگ زمین پر چادر بچھا کر بیٹھ جاتے ہیں، ایڈیشنل سینئر ڈائریکٹر سول ایوی ایشن اتھارٹی نے کہا اسلام آباد ایئر پورٹ بہت بڑا بن گیا ہے وہاں کافی سہولیات ہیں، جس پر چیف جسٹس کا کہنا تھا اسلام آباد ایئر پورٹ چار دن کا مہمان ہے، کبھی بھی گر جائے گا، سرکار اس ایئر پورٹ کو بنانے میں دس دفعہ قیمت ادا کرچکی ہے عدالت نے مختلف حادثات اور قانونی کارروائی ایئر پورٹ آپریشن سے متعلق ڈی جی سول ایوی ایشن اتھاڑتی کو دو ہفتے میں رپورٹ کے ساتھ پیش ہونے کا حکم دے دیا۔
