اسلام آباد(آن لائن) وزارت مذہبی امور نے قرآن پاک کے شہید اوراق کی حفاظت اور ری سائیکلنگ کیلئے وفاق اور صوبوں کی سطح پر پلانٹس لگانے کا فیصلہ کر لیا ہے،ری سائیکلنگ پلانٹ لگانے کیلئے وفاقی اور صوبائی سطح پر قوانین میں تبدیلی کی جائے گی اور اسلامی نظریاتی کونسل سے رائے لی جائے گی نمائندہ کمیٹیاں تشکیل دے دی گئیں ہیں۔
وفاقی سیکرٹری مذہبی امور میاں مشتاق بورانہ کی سربراہی میں قرآن پاک کے شہید اوراق کو اکھٹا کرنے، شریعت کے مطابق حفاظت یا ری سائیکلنگ پلانٹ لگانے سے متعلق بین الصوبائی اجلاس منعقد ہوا اجلاس میں وزارتِ مذہبی امور کے ڈی جی سید مشاہد حسین خالد، پنجاب کے صوبائی سیکرٹری قرآن بورڈفرید احمد، اسپیشل سیکرٹری سندھ الطاف احمد بجرانی، بلوچستان اور گلگت بلتستان کے ایڈیشنل سیکرٹریز، اسلامی نظریاتی کونسل کے سیکرٹری ڈاکٹر اکرام الحق اور قرآن کمیٹی اسلام آباد کے اراکین نے شرکت کی۔ اجلاس میں طے پایا کہ شہید قرآنی اوراق اور مقدس صفحات کی مناسب شرعی طریقہ سے تلفی کے انتظامات کرنا نہایت اہم ہیں۔ شہید قرآنی اوراق کیلئے ری سائیکلنگ کیلئے جدید دور سے ہم آہنگ ری سائیکلنگ پلانٹس وفاقی اور صوبائی سطح پر قائم کئے جائیں گے۔ ضلعی حکومتوں کے ڈی سیز اور ڈی سی اورز کے ذریعے مقدس اوراق جمع کرنے کا انتظام کیا جائے گا۔ اجلاس میں یہ بھی طے پایا مقدس اوراق اور شہید قرآن پاک کی ری سائیکلنگ کے دوران کیمیکل کے استعمال کیلئے اسلامی نظریاتی کونسل سے رائے لی جائے گی۔ ضلعی سطح پر شہید اوراق کی مناسب تلفی کیلئے صوبوں اور وفاق کے تعاون سے کمیٹی بنائی جائے گی۔ اس سلسلے میں وفاقی اور صوبائی سطح پر تیار کردہ قوانین میں تبدیلی جائے گی۔ نیز نجی سطح پر مقدس اوراق کے تحفظ کے رضاکاروں کے ساتھ وزارتِ مذہبی امور ایک الگ اجلاس منعقد کرے گی۔
