کراچی(این این آئی) وزیراعظم عمران خان کی خصوصی کاوشوں سے ملائیشیا میں محصور300 سے زائد رہائی پانے والے پاکستانی شہریوں کو پی آئی اے کے ذریعے وطن واپس لایا جائے گا۔رہا ہونے والے پاکستانی شہری مختلف وجوہات کی بنا پر ملائشین حکام کی تحویل میں تھے۔

ہم وطنوں کی وطن واپسی کے لئے پی آئی اے نے بڑا فیصلہ کیا ہے جس کے مطابق پی آئی اے 31 دسمبر کو کوالالمپور سے اسلام آباد کے لئے خصوصی پرواز چلائے گی بو ئنگ 777 طیا رہ استعما ل کیا جا ئے گا۔خصو صی پرواز کے ذریعے ملائیشیا میں محصور 300 سے زائد پاکستانی اپنے پیاروں کے پاس واپس وطن پہنچیں گے۔اس حوالے سے ترجمان پی آئی اے نے بتایا کہ پی کے9895 کوالالمپور کے مقامی وقت کے مطابق30 اور31 دسمبر کی درمیانی شب سا ڑھے تین بجے روانہ ہوگی اور صبح 9:50 پر اسلام آباد پہنچے گی۔انہوں نے بتایا کہ اتنی بڑی تعداد میں لوگوں کو اتنی جلدی لانے کیلئے کوئی بھی ایئرلائن تیار نہ تھی۔پی آئی اے کے چیف ایگزیکٹو آفیسر ایئر مارشل ارشد ملک نے فوری طور پر اس معاملے کو اہم قومی فریضہ سمجھتے ہوئے ہم وطنوں کو واپس پاکستان پہنچانے کے لئے خصوصی پرواز چلانے کا اعلان کیا۔ائیر ما رشل ارشد ملک نے کہا کہ پی آئی اے نے ہمیشہ قومی ضرورت کے وقت اپنی ذمہ داریاں نبھانے کیلئے قدم بڑھایا ہے۔پاکستانی بھائیوں کو بیرون ملک کبھی بے یارو مددگار نہیں چھوڑا۔ پی آئی اے آئندہ بھی قومی ذمہ داری نبھانے کا عزم رکھتی ہے کیونکہ پی آئی اے پاکستان ہے اور پاکستان پی آئی اے ہے۔

موضوعات:پاکستانی کب پاکستان پہنچ رہے ہیں