اسلام آباد(آن لائن)لاہور واقعہ کے بعد اسلام آباد بار نے وکلا کے لیے نیا ایس او پی جاری کر دیا ہے۔وکلا یونیفارم میں سفر نہ کریں،کالا کوٹ دفتر الماری میں ہی رکھیں،گاڑیوں میں لگی ایڈووکیٹس کی نمبر پلیٹس فوری اتارنے کا حکم۔انتہائی معتبر ذرائع سے معلوم ہو اہے کہ اسلام آباد بار میں گزشتہ روز لاہور واقعہ پر ایک اجلاس ہوا اور اس میں تمام پہلوؤں کاجائزہ لیا گیا،اور یہ طے پایاکہ اب جب تک یہ معاملہ حل نہیں ہو جاتا اس وقت تک وکلا کالا کوٹ دفتر میں رکھ کر جائیں اور گاڑیوں کی
نمبر پلیٹس پر ایڈووکیٹس کی تحریر بھی ختم کر دی جائے،اور یہ بھی فیصلہ کیا گیا کہ سینئر وکلا سوشل میڈیا سمیت تمام میڈیا پر عوامی حق میں گفتگو کریں اور لاہور واقعہ سے متعلق کوئی سخت زبان استعمال نہ کی جائے،ذرائع کا کہنا ہے کہ عوامی غیض و غضب سے بچنے کے لیے وکلا کی صفوں میں کافی بے چینی پائی جاتی ہے اور ان کا خیال ہے کہ عوام نے اگر وکلا سے لاہور واقعہ پر بدلہ یا کسی ناراضگی کا اظہا رکیا تو وہ ناقابل تلافی نقصان کا پیش خیمہ ہو گا۔
