اسلام آباد (این این آئی)وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ سی پیک ہماری ترجیح نمبر ایک ہے ،یہ عظیم راہداری پاکستان اور چین ہی نہیں ،پورے خطے کی اقتصادی ترقی اور خوشحالی کی نئی راہیں کھولے گی۔
سی پیک کے تحت اقتصادی زونز کے قیام سے عوام کیلئے خوشحالی اور روزگار کے مواقع پیدا ہوں گے۔ ایک بیان میں معاو ن خصوصی نے کہاکہ سی پیک ہماری ترجیح نمبر ایک ہے۔ انہوں نے کہاکہ یہ عظیم راہداری پاکستان اور چین ہی نہیں بلکہ پورے خطے کی اقتصادی ترقی اور خوشحالی کی نئی راہیں کھولے گی۔ انہوں نے کہاکہ اس منصوبے کے حوالے سے امریکی خدشات سے اتفاق نہیں کرتے۔ ڈاکٹر فردوس عاشق اعوان نے کہاکہ یہ منصوبہ ہماری اقتصادی ترقی کا ضامن ہے۔چین ہمارا قریبی دوست ہے، آزمائش کی ہر گھڑی میں ہمیشہ ڈٹ کر ساتھ دیا۔ انہوں نے کہاکہ شہد سے میٹھی، ہمالیہ سے بلند اور سمندروں سے گہری پاک چین دوستی دنیا میں ایک مثال بن چکی ہے۔ ڈاکٹر فردوس عاشق اعوان نے کہاکہ سی پیک کے تحت اقتصادی زونز کے قیام سے عوام کیلئے خوشحالی اور روزگار کے مواقع پیدا ہوں گے۔ ڈاکٹر فردوس عاشق اعوان نے کہاکہ چین سے لیے گئے کمرشل قرض میں آنے والے ماہ و سال میں کمی نظر آئے گی۔
