اسلام آباد (پ ر) تحریک جوانان پاکستان کے سربراہ عبداللہ حمید گل نے تیز گام ایکسپریس میں آتشزدگی سے قیمتی انسانی جانوں کے ضیاع پر گہرے رنج وغم اور صدمے کا اظہارکرتے ہوئے واقعہ کی اعلی سطحی تحقیقات کا مطالبہ کیا ہے۔
جمعرات کو اپنے بیان میں انہوں نے متاثرہ خاندانوں سے اظہار ہمدردی کرتے ہوئے کہا ہے کہ بیان بازی کو ایک طرف رکھ کر ان قیمتی انسانی جانوں کے ضیاع کے حقیقی اسباب کا تعین اولین ترجیح ہونا چاہئے۔ عبداللہ حمید گل نے کہاکہ ریل کے پے درپے حادثات کی بنیادی وجوہات کا ادراک اور ان کا تدارک کئے بغیر وقتی بیان بازی کا کوئی فائدہ نہیں۔ حادثات و و۱قعات پر مٹی ڈالنے کا رویہ تبدیل ہونا چاہئے۔ انہوں نے کہاکہ یہ عوامی سواری ہے،لیکن اس واقعے سے اندازہ ہورہا ہے کہ اس میں سامان کی جانچ پڑتال کا کوئی نظام موجود نہیں۔ اسی طرح کے کسی نظام کی عدم موجودگی مزید بھی حادثات کا باعث بن سکتی ہے۔ اس حادثہ سے یہ بھی معلوم ہوا کہ ریل کی بوگیوں میں آگ بجھانے والے آلات بھی موجود نہیں۔ عبداللہ حمید گل نے کہاکہ ٹرین میں ہزاروں لوگ سفر کرتے ہیں، اس کی اصلاح کے لئے بیان بازی اور سیاسی شعبدہ بازی کے بجائے توجہ، سنجیدگی اور قومی جذبے سے اقدامات کئے جائیں۔ عام آدمی کی زندگی کو سیاسی بیانات کی نذر کردینے سے بڑی سفاکی اور بے رحمی اور نہیں ہوسکتی۔انہوں نے دعا کی کہ اللہ تعالی مرحومین کو اپنے جوار رحمت میں جگہ عطا فرمائے اور لواحقین کو یہ صدمہ برداشت کرنے کی ہمت دے۔ انہوں نے زخمیوں کی جلد صحت یابی کی بھی دعا کی۔
