اسلام آباد (این این آئی)اسلام آباد ہائی کورٹ نے وزیراعظم عمران خان کے خواجہ آصف کے خلاف دس ارب روپے ہرجانہ کیس میں خواجہ آصف کی ٹرائل کورٹ کے فیصلے کے خلاف درخواست پر وزیر اعظم عمران خان کو نوٹس جاری کر تے ہوئے جواب طلب کرلیا۔ چیف جسٹس اطہر من اللہ نے کیس کی سماعت کی۔ وکیل نے کہاکہ ٹرائل کورٹ نے وزیراعظم عمران خان کی کچھ دستاویزات نکالنے کی درخواست منظور کی، خواجہ آصف نے ٹرائل کورٹ کے فیصلے کو اسلام آباد ہائیکورٹ میں چیلنج کیا ہے۔ چیف جسٹس اطہرمن اللہ نے
کہا کہ خواجہ آصف کی نااہلی کا حکم اسی عدالت نے دیا تھا، کیا خواجہ آصف کو اس بینچ پر اعتراض تو نہیں۔ وکیل خواجہ آصف علی شاہ گیلانی نے کہاکہ خواجہ آصف کو آپ کے کیس سننے پر کوئی اعتراض نہیں،2012 سے عمران خان کا ہرجانہ کیس زیر التوا ہے۔ چیف جسٹس نے کہاکہ کیا ابھی تک زیرالتوا ہے؟ عدالت نے کس سٹیج پر کہا یہ دستاویزات متعلقہ نہیں۔کیس کی مزید سماعت دو ہفتوں کے لیے ملتوی کردی گئی۔خواجہ آصف نے شوکت خانم اور فارن فنڈنگ کے حوالے سے 2012 میں عمران خان پر الزامات لگائے تھے۔
