اسلام آباد(مانیٹرنگ ڈیسک)شمالی وزیرستان دھماکے میں شہید لیفٹیننٹ کرنل راشد کریم بیگ کی نماز جنازہ گلگت کے علاقے جوٹیال میں ادا کی گئی جس کے بعد شہید کا جسد خاکی ہیلی کاپٹر کے ذریعے آبائی علاقے ہنزہ روانہ کیا گیاجہاں ان کی مکمل فوجی اعزاز کے ساتھ تدفین کی گئی۔اس موقع پر ایسے مناظر دیکھنے کو آئے جس نے ہر آنکھ اشکبار کر دی۔اس حوالے سے سوشل میڈیا پر ایک ویڈیو بھی وائرل ہو رہی ہے جس میں شہید کا بیٹا “بابا بابا” کی صدائیں
لگاتے ہوئے رو رہا ہے اور والد کے تابوت کو چھوڑنے کا نام نہیں لے رہا۔اسی پر تبصرہ کرتے ہوئے معروف صحافی عارف حمید بھٹی کا کہنا تھا کہ جو لوگ میری فوج کو برا بھلا کہتے ہیں وہ ایک بار یہ ویڈیو دیکھ لیں۔جب میں اور آپ گھر میں سو رہے تھے تو یہ کرنل شہید ہوا۔ان کی بیوہ پر نہ جانے کیا گزر رہی ہو گی اور ان کا معصوم بیٹا کس سے سوال کرے گا کہ میرا باباکہاں ہے؟عمران خان کو ان کے اہل خانہ سے ملاقات کرنے کے لیے ہنزہ جانا چاہئے۔
