لاہور( این این آئی )وزیراعلیٰ پنجاب سردار عثمان بزدارکی جانب سے گندم خریداری مہم کی کامیابی پر کاشتکاروں کو شکریہ کے ایس ایم ایس کئے گئے ۔وزیراعلی سردار عثمان بزدار کی جا نب سے 8لاکھ21ہزار کاشتکاروں کوشکریہ کے ایس ایم ایس کیے گئے۔وزیر اعلیٰ پنجاب نے گندم خریداری کے

ہدف کے حصول پر صوبائی وزیر خوراک،سیکرٹری خوراک اورفیلڈ سٹاف کی کارکردگی کی بھی تعریف کی ہے۔ وزیر اعلیٰ پنجاب نے کہا ہے کہ میں پنجاب حکومت کی گندم خریداری مہم کی پذیرائی پر کاشتکاروں کا شکریہ ادا کرتا ہوں۔ گندم خریداری مہم 2019 کے دوران کسانوں کو پہلی باران کی محنت کاپورا معاوضہ ملا ہے۔ 32.5لاکھ ٹن گندم کے عوض106ارب ر وپے کی فوری ادائیگی کردی گئی ہے۔سیاسی وابستگیوں سے بالاتر ہوکر تمام کاشتکاروں کو بلا تخصیص باردانہ کی فراہمی یقینی بنائی گئی۔انہوں نے کہا کہ گندم کے کاشتکاروں کے مفادات کا تحفظ کرکے انہیں ان کا حق دیا گیا۔چھوٹے کاشتکار کے حقوق کے تحفظ کو ہر قیمت پر یقینی بنایا گیا۔ کاشتکاروں کو گندم کی فصل کامقررکردہ معاوضہ ملا۔سردار عثمان بزدار نے کہا کہ گندم خریداری مراکز پر کاشتکاروں کو تمام ضروری سہولتیں فراہم کی گئیں۔میں نے گندم خریداری مہم کی خود نگرانی کی۔تحریک انصا ف کی حکومت کسان دوست حکومت ہے اور کسانوں سے کئے گئے وعدے پورے کیے ہیں۔ آئندہ بھی کاشتکاروں کی فلاح اوران کے حقوق کے تحفظ کیلئے کوئی کسر اٹھا نہ رکھیں گے۔