کراچی(آن لائن) رویت ہلال کمیٹی کے چیئرمین مفتی منیب الرحمان نے کہا ہے کہ فواد چوہدری پاکستان کی تاریخ کو مسخ نہ کریں، جب علماء قیام پاکستان کی حمایت کر رہے تھے تو ان وزراء کا وجود بھی نہیں تھا،تمام مکاتب فکر کے علماء نے قیام پاکستان کی حمایت کی تھی۔ میڈیا سے گفتگو کرتے ہوئے مفتی منیب الرحمان نے کہا کہ وفاقی وزیر سائنس و ٹیکنالوجی فواد چوہدری نظام سے لاعلم ہیں ان کو معلوم ہونا چاہئے کہ رویت ہلال کمیٹی کا اجلاس محکمہ موسمیات مین ہوتا ہے کبھی بھی ایسا نہیں ہوتا کہ کھلے آسمان میں چاند نظر نہ آتا ہو فواد چوہدری چاہیں تو انہیں سو سال

کا کلینڈر بھی بنا دیں گے وہ جلسہ بھی کر لیں، دینی معاملات میں باتوں سے پرہیز کرنا چاہئے، فواد چوہدری پاکستان کی تاریخ کو مسخ نہ کریں وزیراعظم عمران خان وزراء کو ہدایت جاری کریں کہ وہ تاریخ کو مسخ نہ کریں اور وزراء کو تاریخ پاکستان کا مطالعہ کروائیں، مفتی منیب الرحمان نے کہا کہ فواد چوہدری نے کہا کہ علماء نے قیام پاکستان کی مخالفت کی جب علماء پاکستان کی حمایت کر رہے تھے تو ان وزراء کا وجود بھی نہیں تھا تمام مکاتب فکر کے علماء نے پاکستان کے قیام کی حمایت کی تھی کچھ لوگوں کی وجہ سے علماء و مشائخ کو بدنام کیا جارہا ہے۔