کوئٹہ(این این آئی)کوئٹہ کے بولان میڈیکل کمپلیکس میں خاتون مریضہ کو کپڑے پر بٹھانے کے بعد علاج کیلئے گھسیٹ کر لے جانے کی دلخراش ویڈیو سوشل میڈیا پر وائرل ہوگئی جس کے بعد صوبائی حکومت نے نوٹس لے لیا ۔تفصیلات کے مطابق سوشل میڈیا پر وائرل ہونے والی ویڈیو بلوچستان میڈیکل کمپلیکس کی ہے جس میں دیکھا گیا کہ خاتون مریضہ کو ایک خاتون کپڑے پر بیٹھا کر گھسیٹ رہی ہیں اور مریضہ کو
غالباً ڈاکٹر کے کمرے میں لے جایا جارہا تھا۔ویڈیو کے وائرل ہونے کے بعد سوشل میڈیا صارفین نے بلوچستان حکومت کو شدید تنقید کا نشانہ بنایا اور ہسپتالوں میں بنیادی سہولیات کی کمی پر غم و غصے کا اظہار کیا۔ دوسری جانب صوبائی حکومت نے ویڈیو منظر عام پر آنے کے بعد واقعے کا نوٹس لیا، جب کہ ترجمان بلوچستان حکومت کا کہنا ہے کہ مریضہ کو گھسیٹ کر لے جانے کی ویڈیو دلخراش ہے اس کی تحقیقات کا حکم دے دیا گیا ہے۔
