اسلام آباد( آن لائن )ترجمان دفتر خارجہ ڈاکٹر محمد فیصل نے ڈاکٹر عافیہ صدیقی سے متعلق خود سے منسوب بیان کی تردید کر دی، ڈاکٹر محمد فیصل نے کہا کہ ڈاکٹر عافیہ صدیقی سے متعلق میرے بیان کو توڑ مروڑ کر پیش کیا گیا۔ میں نے ہرگز یہ بیان نہیں دیا کہ ڈاکٹر عافیہ صدیقی پاکستان واپس نہیں آنا چاہتیں، وزیراعظم کا بیان بھی سیاق وسباق سے ہٹ کرپیش کیا گیا۔
وزیراعظم عمران خان کا ایران کا دو روزہ دورہ کامیاب رہا، دونوں سربراہان نے مقبوضہ کشمیرکے مسئلے کے حل کی بات کی،زائرین کے امور سمیت تجارت و دیگر شعبوں میں تعلقات کے فروغ پراتفاق ہوا، سری لنکا دھماکوں کی مذمت کرتے ہیں پاکستان سے جو مدد درکار ہوگی فراہم کرینگے ۔ تفصیلات کے مطابق ترجمان دفتر خارجہ نے ہفتہ وار پریس بریفنگ میں کہا کہ ڈاکٹر عافیہ صدیقی کی وطن واپسی کے لیے اقدامات جاری ہیں۔ڈاکٹر عافیہ صدیقی کی پاکستان واپسی کے معاملے کو واشنگٹن کے ساتھ اٹھایا جارہا ہے ڈاکٹر عافیہ صدیقی سے متعلق میرے بیان کو توڑ مروڑ کر پیش کیا گیا۔ میں نے ہرگز یہ بیان نہیں دیا کہ ڈاکٹر عافیہ صدیقی پاکستان واپس نہیں آنا چاہتیں۔انہوں نے ایران میں دئے گئے وزیراعظم عمران خان کے بیان پر کہا کہ وزیراعظم کا بیان بھی سیاق وسباق سے ہٹ کرپیش کیا گیا۔ وزیراعظم نے غیرریاستی عناصرکی بات کی تھی ، کلبھوشن بھی ایران سے ملحقہ پاکستانی سرزمین سے گرفتار ہوا تھا۔وزیراعظم عمران خان کا ایران کا دو روزہ دورہ کامیاب رہا۔ وزیراعظم کے دورہ ایران کا مقصد ہمسایوں سیاچھے تعلقات کی پالیسی ہے، دورے میں تجارت، زائرین سے متعلق بات چیت کی گئی، دونوں سربراہان نے مقبوضہ کشمیرکے مسئلے کے حل کی بات کی۔
وزیراعظم کے دورہ ایران میں سرحدی سلامتی پر گفتگوہوئی۔ جبکہ زائرین کے امور سمیت تجارت و دیگر شعبوں میں تعلقات کے فروغ پراتفاق ہوا۔ترجمان دفتر خارجہ نے سری لنکا دھماکوں پر اظہار مذمت کرتے ہوئے کہا کہ سری لنکا کو جو مدد پاکستان سے درکار ہوگی، ہم فراہم کریں گے۔ ہم سری لنکا میں دہشت گردی کے واقعات کی مذمت کرتے ہیں۔ وزیراعظم عمران خان کے دورہ چین سے متعلق ترجمان دفتر خارجہ نے کہا کہ وزیراعظم کا یہ دورہ انتہائی اہم اور دلچسپ ہو گا۔ وزیراعظم چین کی قیادت اور عالمی رہنمائوں سے ملاقاتیں کریں گے۔
