اسلام آباد/نئی دہلی (آئی این پی ) کراچی میں چینی قونصلیٹ پر دہشتگرد حملے کے ماسٹر مائنڈ اور بی ایل اے کے کمانڈر اسلم عرف اچھو کے اس وقت بھارت میں موجود ہونے کا انکشاف ہوا ہے ۔ذرائع کے مطابق چینی قونصلیٹ حملے کا ماسٹر مائنڈ اسلم عرف اچھو ہے جو اس وقت بھارت میں موجود ہے۔ ذرائع کے مطابق چینی قونصل خانے پر حملے کا ماسٹر مائنڈ اسلم اچھو ہے جس کا تعلق کالعدم تنظیم بلوچستان لبریشن آرمی (بی ایل اے)سے ہے اور یہ دہشتگرد ان دنوں بھارتی دارالحکومت نئی دہلی کے ہسپتال میں زیر علاج ہے۔
ابتدائی رپورٹ کے مطابق حملہ کرنے والے دہشتگردوں کی شناخت عبدالرازق، ازل خان مری عرف سنگت دادا اور رئیس بلوچ کے نام سے ہوئی ہے، دہشتگرد عبدالرازق بلوچستان حکومت کا ملازم اور ضلع خاران کا رہائشی تھا، قانون نافذ کرنیوالے اداروں نے ابتدائی رپورٹ تیار کر کے وزیراعلی کو پیش کر دی ہے۔ذرائع کا کہنا ہے کہ تینوں دہشت گرد لاپتہ افراد کی فہرست میں شامل تھے، ادھر کیس میں اہم پیشرفت سامنے آئی ہے، قانون نافذ کرنیوالے اداروں نے شوروم پر کارروائی کے دوران دو افراد کو حراست میں لے لیا ہے، دہشتگرد حملے میں استعمال ہونے والی گاڑی کے مالک نے جس شوروم پر گاڑی فروخت کی، چھاپہ وہاں مارا گیا ہے۔ واضح رہے کہ کر اچی کے علاقے کلفٹن میں پولیس اور سیکیورٹی اہلکاروں نے چینی قونصل خانے پر حملے کو ناکام بناتے ہوئے 3 دہشتگردوں کو ہلاک کردیا، فائرنگ کے نتیجے میں 2 پولیس اہلکار شہید جبکہ ایک سیکیورٹی گارڈ زخمی ہوگیا، دہشتگردوں کے قبضے سے خودکش جیکٹ اور اسلحہ بھی برآمد کرلیا گیا، دہشت گرد قونصل خانے کے کمپانڈ میں داخل نہیں ہوسکے،قونصل خانے کا تمام چینی عملہ بالکل محفوظ رہا،گورنر سندھ عمران اسمعیل اور وزیر اعلی سندھ مراد علی شاہ نے فائرنگ کے واقعے کا نو ٹس لے لیا ، انسپکٹر جنرل (آئی جی)سندھ پولیس سے فوری طور پر رپورٹ کرلی ۔ جمعہ کو کراچی پولیس چیف ڈاکٹر امیر شیخ کے مطابق صبح ساڑھے 9 بجے کے قریب 3 دہشت
گردوں نے چینی قونصل خانے میں داخل ہونے کی کوشش کی، تاہم گارڈز کے روکنے پر انہوں نے فائرنگ کردی، جس پر قونصلیٹ پر تعینات سیکیورٹی گارڈز نے بھی جوابی فائرنگ کی، اس دوران دھماکے کی آواز بھی سنی گئی۔انہوں نے بتایا کہ حملہ آوروں کی فائرنگ کے نتیجے میں 2 پولیس اہلکار شہید اور سیکیورٹی گارڈ زخمی ہوا۔اس سے قبل ڈی آئی جی ساتھ جاوید عالم اوڈھو نے بھی تصدیق کی کہ ملزمان کی جانب سے کیے گئے ابتدائی حملے میں قونصلیٹ پر تعینات 2 پولیس اہلکار شہید ہوئے جبکہ ایک سیکیورٹی گارڈ کو زخمی حالت میں جناح اسپتال منتقل کیا گیا۔
