اسلام آباد (نیوز ڈیسک)گیلپ اور گیلانی ریسر فاؤنڈیشن کی جانب سے کرائے گئے سروے کے مطابق 49 فیصد پاکستانیوں کی رائے ہے کہ تحریک انصاف کی حکومت پچھلی حکومتوں سے قدرے بہتر کارکردگی دکھا رہی ہے، اس سروے میں چاروں صوبوں کے مختلف افراد سے رائے لی گئی اور مرد و خواتین سے سوال پوچھا گیا کہ کچھ لوگ سوچتے ہیں کہ تحریک انصاف کی حکومت کی اب تک کارکردگی گزشتہ حکومت سے بہتر ہے جبکہ کچھ کا کہنا ہے کہ کارکردگی ان
سے بھی گئی گزری ہے،آپ اس بارے میں کیا رائے رکھتے ہیں؟ اس کے جواب میں 49 فیصد لوگوں نے کہا کہ حکومت کی کارکردگی پچھلی حکومتوں سے بہتر ہے، 27 فیصد لوگوں کا کہنا ہے کہ تحریک انصاف کی حکومت کی کارکردگی پچھلی حکومتوں کی نسبت زیادہ گئی گزری ہے، اس کے برعکس 18 فیصد لوگوں نے کہا کہ گزشتہ حکومتوں اور تحریک انصاف کی حکومت میں کوئی فرق نہیں ہے، جبکہ چھ فیصد لوگوں نے اپنی رائے دینے سے ہی انکار کر دیا۔
