لاہور (مانیٹرنگ ڈیسک ) دودھ دودھ ہوتا ہے اور مصنوعی ڈرنک اس کا متبادل نہیں ہوتا کے حوالے سے پنجاب فوڈ اتھارٹی نے ذائقے دار دودھ کے نام پر بننے والے ڈیری ڈرنکس پر مکمل پابندی عائد کر دی۔ڈی جی فوڈ اتھارٹی کیپٹن(ر) عثمان نے بتایا کہ کمپنیوں کو گزشتہ اسٹاک 5دسمبر تک ختم کرنے کی ڈیڈ لائن جاری کر دی گئی ہے، پابندی سائنٹیفک پینل کی مکمل تحقیق کے بعد عائد کی گئی ہے، فلیورڈ ملک کے نام پر فروخت ہونے والے ڈیری ڈرنکس کو بچے دودھ سمجھ کر پیتے ہیں۔کیپٹن (ر) عثمان نے کہا کہ
ڈیری ڈرنکس میں استعمال ہونے والے دودھ میں سے غذائیت والے اجزا نکال لیے جاتے ہیں، ڈیری ڈرنکس دودھ سے صحت مند فیٹ اور کریم نکالنے کے بعد مصنوعی اجزا شامل کر کے بنائے جاتے ہیں، ڈیری ڈرنکس کو دودھ کہہ کر بیچنا سراسر دھوکا دہی ہے۔ڈی جی فوڈ اتھارٹی نے بتایا کہ 5دسمبر 2018 کے بعد ڈیری ڈرنک بنانے، اسٹور اور فروخت کرنے پر مکمل پابندی ہو گی۔عوام سے گزارش ہے کہ بچوں کو مصنوعی اور بازاری اشیا کم سے کم استعمال کرائیں، گھر کی بنی ہوئی اشیا ہی بہترین خوراک ہیں۔
