اسلام آباد (مانیٹرنگ ڈیسک)آسیہ کی رہائی کے بعد احتجاج، وزیراعلیٰ پنجاب کی زیر صدارت لاہور سمیت پنجاب بھر میں امن و امان کی صورتحال پر جائزہ اجلاس، کاروبار زندگی کو رواں رکھنے کے لیے ہر ممکن اقدام کیا جائے، شہریوں کے جان و مال کا تحفظ ریاست کی اولین ذمہ داری ، ریاست یہ ذمہ داری فرض سمجھ کر ادا کریگی، عثمان بزدار کا اجلاس سے خطاب۔
تفصیلات کے مطابق توہین رسالت ؐ میں سزائے موت پانیوالی آسیہ بی بی کی رہائی کے خلاف ملک بھر میں احتجاج کا سلسلہ جاری ہے اور پنجاب میں حکومت نے امن و امان کی صورتحال کو قابو میں رکھنے کیلئے دفعہ 144نافذ کرتے ہوئے عوامی اجتماعات کے انعقاد پر پابندی عائد کر دی گئی ہے ۔ وزیراعلیٰ پنجاب سردار عثمان بزدار کی زیر صدارت آج امن و امان کی صورتحال کا جائزہ لینے کیلئے اجلاس منعقد ہوا جس میں اہم حکومتی حکام سمیت امن و امان سے متعلقہ اداروں کے حکام نے شرکت کی۔ اجلاس سے خطاب کرتے ہوئے وزیراعلیٰ پنجاب کا کہنا تھا کہ وزمرہ کے معمولات میں خلل ڈالنے کی اجازت نہیں دی جا سکتی۔ کاروبار زندگی کو رواں رکھنے کے لیے ہر ممکن اقدام کیا جائے۔ ٹریفک کی بندش سے شہریوں کو درپیش مشکلات کا اندازہ ہے۔ وزیراعلٰی پنجاب نے ہدایت کی کہ ٹریفک کے لیے متبادل روٹس کی تشہیر کی جائے تاکہ شہریوں کو پیش آنے والی مشکلات کم ہو سکیں۔عثمان بزدار کا کہنا تھا کہ شہریوں کے جان و مال کا تحفظ ریاست کی اولین ذمہ داری ہے، اور ریاست یہ ذمہ داری اپنا فرض سمجھ کر ادا کرے گی۔واضح رہے کہ آسیہ بی بی کی رہائی کا فیصلہ آنے کے بعد ملک بھر میں احتجاج کا سلسلہ شروع ہو گیا تھا جس کا زیادہ زور راولپنڈی ، اسلام آباد، لاہور، فیصل آباد اور دیگر بڑے شہروں میں دیکھنے کو ملا۔ تاہم کراچی اور دیگر شہروں میں بھی احتجاج کا سلسلہ جاری ہے۔ حکومت سندھ نے صوبے بھر میں دفعہ 144نافذ کرتے ہوئے موٹر سائیکل کی ڈبل سواری پر پابندی عائد کر دی ہے۔

موضوعات:امن وامان جائزہ اجلاس عثمان بزدار وزیراعلیٰ پنجاب