اسلام آباد(مانیٹرنگ ڈیسک)لاہور کا فائیو سٹار آواری ہوٹل 10ارب روپے مالیت کی وفاقی حکومت کی زمین پر تعمیر کیاگیا، محکمہ اینٹی کرپشن نے سورس رپورٹ پر تحقیقات کا آغاز کر دیا، نجی ٹی وی کی رپورٹ میں سنسنی خیز انکشافات۔ تفصیلات کے مطابق نجی ٹی وی رپورٹ میں انکشاف کیا گیا ہے کہ لاہور کا فائیو سٹار آواری ہوٹل 10ارب روپے مالیت کی وفاقی حکومت کی اراضی پر تعمیر کیا گیا ہے ، محکمہ اینٹی کرپشن نے سورس رپورٹ
پر تحقیقات کا آغاز کرتے ہوئے پٹواری کی رپورٹ اور ریونیو ریکارڈ حاصل کرلیا ہے۔ نجی ٹی وی نے محکمہ اینٹی کرپشن ذرائع کے حوالے سے اپنی رپورٹ میں بتایا ہے کہ لاہور کی مال روڈ پر قائم آواری ہوٹل وفاقی حکومت کی 96کنال اراضی پر تعمیر کیا گیا ہے۔ یہ بیش قیمت اراضی 1947میں ایک ہندو بہادر گوپال داس کے نام تھی جبکہ ریونیو ریکارد کے مطابق اراضی کا حق ملکیت 1963میں وفاقی حکومت کے نام ٹرانسفر ہو گیا تھا۔
