اسلام آباد (این این آئی)پاکستان پیپلز پارٹی کے رہنما سابق وزیر اعظم راجہ پرویز اشرف نے کہا ہے کہ حکومت این آر او نہیں کر واسکتی‘ مسائل سے توجہ ہٹانے کیلئے اس طرح کے بیانات دیئے جارہے ہیں ٗ اے پی سی کے حوالے سے مولانا فضل الرحمن مشاورت کررہے ہیں ٗ مولانا نے ابھی ہمیت نہیں ہاری ٗکسی بھی اے پی سی کے فوری نتائج مانگنا درست نہیں‘ فوری نتائج آنے میں وقت درکار ہے ٗوزیراعظم کا عوام کی شکایات سننے کے لئے آن لائن شکایات آغاز درست ہے ٗ

حکومت کے اچھے کام کی تعریف کرینگے ۔پیر کو پارلیمنٹ ہاؤس کے باہر میڈیا سے گفتگو کرتے ہوئے سابق وزیراعظم راجہ پرویز اشرف نے کہا کہ این آر او حکومت سے کون مانگ رہا ہے۔ پہلے یہ واضح ہونا چاہیے لیکن حکومت این آر او نہیں دے سکتی ٗ یہ بیانات اس لئے دیئے جارہے ہیں کہ عوام کی توجہ اصل مسائل سے ہٹائی جائے اور نہ ہی جمہوریت کو کوئی خطرہ ہے۔ انہوں نے کہا کہ 22 کروڑ عوام جمہوریت کے ساتھ کھڑے ہیں اور دفاع کرنا جانتے ہیں۔ راجہ پرویز اشرف نے کہا کہ اے پی سی کے حوالے سے مولانا فضل الرحمان مشاورت کر رہے ہیں۔ انہوں نے ابھی ہمت نہیں ہاری۔ انہوں نے کہاکہ ہر جماعت کی اپنی الگ الگ سیاست ہے اور الگ نقطہ نظر ہے لیکن جمہوریت اور ملک کے لئے ایک پیج پر ہیں۔ انہوں نے کہا کہ کسی بھی اے پی سی کے فوری نتائج مانگنا درست نہیں‘ فوری نتائج آنے میں وقت درکار ہے۔انہوں نے کہاکہ وزیراعظم نے عوام کی شکایات سننے کے لئے آن لائن شکایات کا جو آغاز کیا وہ درست ہے۔ اس سے بغیر سفارش اور وقت کے ضیاع کے بغیر کوئی بھی شخص اپنی شکایات درج کروا سکے گا۔ انہوں نے کہا کہ آن لائن شکایات کا حصول درست ہے لیکن شکایات سیل اس کا ازالہ بھی کرے اور عوام کی شکایات کو سن کر حل کرے تو بہتر ہوگا۔ راجہ پرویز اشرف نے کہا کہ حکومت کے ہر اچھے کام کی تعریف کریں گے اور اچھے کاموں کے لئے حکومت کے ساتھ کھڑے ہوں گے۔