اسلام آباد (این این آئی)پاکستان مسلم لیگ (ن)کے صدر شہباز شریف اور سابق صدر آصف علی زرداری نے قومی اسمبلی کے اجلاس میں شرکت کیلئے ایوان میں ایک ساتھ داخل ہوکر حیران کردیا۔ پیر کو دونوں رہنما لابی سے ایک ساتھ ہنستے مسکراتے اور خوشگوار موڈ میں گفتگو کرتے ہوئے اسمبلی کے فلور پر داخل ہوئے۔اس موقع پر آصف زرداری اورشہباز شریف کی پارلیمنٹ ہاؤس کی لابی میں غیررسمی ملاقات بھی ہوئی۔بعد ازاں آصف زرداری قومی اسمبلی کے
اجلاس سے واپس زرداری ہاؤس روانہ ہوئے ٗ اس موقع پر صحافی نے ان سے سوال کیا کہ کیا شہبازشریف سے ملاقات میں آل پارٹیز کانفرنس پر کوئی پیش رفت ہوئی؟صحافی کے سوال پر آصف علی زرداری نے کہا کہ ابھی کوئی پیش رفت نہیں ہوئی۔اپوزیشن لیڈر شہباز شریف نے بھی اس حوالے سے سوال کے جواب میں کہا کہ میری زرداری صاحب سے ملاقات ہوئی، ایک دوسرے کی خیریت دریافت کی، آل پارٹیز کانفرنس میں شرکت سے متعلق مشورہ کرکے بتاؤں گا۔
