لاہور(آئی این پی)احتساب عدالت نے 11ارب روپے کے ایم این ایم موٹر سائیکل فراڈ کیس میں ملزم مزمل کو 15روزہ جسمانی ریمانڈ پر نیب کے حوالے کر دیا,آشیانہ ہاؤسنگ سکیم کیس میں گرفتار سابق ڈائریکٹر جنرل لاہور ڈویلپمنٹ اتھارٹی احد چیمہ کے خلاف ایک اور میگا کرپشن کیس شروع کرنے کی تیاری کر لی گئی ،قومی احتساب بیورو (نیب ) کو قائد اعظم تھرمل پاور کمپنی میں کرپشن کیس میں احد چیمہ سے جیل میں تحقیقات کرنے کی اجازت دیدی گئی ۔ احتساب عدالت کے جج محمد اعظم نے درخواست پر سماعت کی ۔ نیب لاہور کی جانب سے قائد اعظم
اعظم تھرمل پاور کمپنی میں کرپشن کے معاملے پر جیل میں احد چیمہ سے تحقیقات کرنے کے لئے پراسیکیوٹر وارث علی جنجوعہ کی وساطت سے درخواست دی گئی تھی جس میں موقف اختیار کیا گیا کہ احد چیمہ نے غیر قانونی طور پر بھرتیاں کیں، اسٹنٹ منیجر اکاؤنٹس اور اسٹنٹ منیجر فنانس بھرتی کئے گئے لہٰذا احد چیمہ سے جیل میں تحقیقات کی اجازت دی جائے ۔احتساب عدالت نے درخواست کو منظور کرتے ہوئے نیب کو احد چیمہ سے جیل میں تحقیقات کی اجازت دیدی ۔دوسری جانب احتساب عدالت کے جج محمد اعظم نے 11ارب روپے کے ایم این ایم موٹر سائیکل فراڈ کیس کی بھی سماعت کی ۔نیب حکام کی جانب سے بتایا گیا کہ ملزم مزمل نے مرکزی ملزم احمد سیال کی معاونت سے عوام سے 94 ملین روپے کی لوٹ مار کی، ملزمان کی جانب سے نئے کسٹمرز سے وصول رقوم میں سے ہی رقوم پرانے کسٹمرز کو بطور منافع دی جاتی رہیں۔ عدالت نے ملزم مزمل کو 15روزہ جسمانی ریمانڈ پر نیب کے حوالے کرتے ہوئے 26اکتوبر کو دوبارہ پیش کرنے کا حکم دیدیا۔