لاہور(آئی این پی )پاکستان مسلم لیگ (ن)کے صدر شہباز شریف نے نیب حراست میں رات دیر تک ٹہلتے ہوئے گزاری،نیب نے شہباز شریف کی صبح تازہ ہوا میں جانے کی درخواست مسترد کردی،تفتیشی ٹیم نے تاحال شہبازشریف سے کوئی پوچھ گچھ نہیں کی۔ تفصیلات کے مطابق آشیانہ ہاسنگ کرپشن کیس میں گرفتار مسلم لیگ (ن)کے صدر اور سابق وزیرِاعلی پنجاب شہبازشریف 10 روزہ جسمانی ریمانڈ پر قومی احتساب بیورو (نیب) کی تحویل میں ہیں۔

ذرائع کے مطابق شہبازشریف نے نیب حراست میں دوسری رات دیر تک جاگتے ہوئے گزاری۔شہبازشریف حوالات میں ٹہلتے رہے اور سادہ کھانے پر ہی اکتفا کیا۔ نیب کی طبی ٹیم نے (ن) لیگ کے صدر کا شوگر لیول اور بلڈ پریشر چیک کیا اور شہبازشریف کی صحت کو تسلی بخش قرار دیا۔ شہبازشریف نے صبح اٹھ کر تازہ ہوا میں جانے کی درخواست کی جسے منظور نہیں کیا گیا۔ ذرائع کے مطابق نیب کی تفتیشی ٹیم نے تاحال شہبازشریف سے کوئی پوچھ گچھ نہیں کی۔