خانیوا ل /کبیروالا(آئی این پی )خانیوا ل کی تحصیل کبیروالا میں انسانیت کی تذلیل کا شرمناک واقعہ پیش آیا ہے جہاں نوجوان کا محبت کی شادی کرنا جرم بن گیا، لڑکی کے رشتے داروں نے نوجوان اور اس کے بھائی پر ظلم کے پہاڑ توڑ دیے، ڈنڈوں سے تشدد کیا، زمین پر ناک رگڑوائی، کتے کی طرح بھونکنے پر مجبور کیا اور وڈیو بھی بنائی،پولیس نے 3 ملزمان کو حراست میں لے لیا
جبکہ واقعے میں ملوث لڑکی کے تایا، چچا اور کزن سمیت دیگر 7 ملزمان کی گرفتاری کے لیے چھاپے مارنے کا سلسلہ جاری ہے ۔ تفصیلات کے مطابق کبیروالا کے نواحی علاقے کنڈ سرگانہ میں انسانیت دم توڑ گئی، محبت کی شادی جرم بن گئی، تلمبہ کے رہائشی نوجوان نے کورٹ میرج کی تو لڑکی کے والدین اسے باقاعدہ رخصت کرنے کا کہہ کرگھر لے گئے۔پھر پانچ روز قبل نوجوان کو بہانے سے کنڈ سرگانہ بلوالیا، نوجوان اپنے بھائی کے ساتھ جب پہنچا تو لڑکی کے رشتے داروں ان کے ساتھ وہ سلوک کیا جس سے انسانیت بھی شرما جائے۔پہلے تشدد کیا، کتے کی طرح بھونکنے پر مجبور کیا، زمین پر ناک رگڑوائی، والد کو گالیاں دلوائیں، یہی نہیں ملزمان اس ظلم کی وڈیو بھی بناتے رہے، زبان کھولنے پر سنگین نتائج کی دھمکیاں بھی دیں۔وڈیو منظرعام پر آنے کے بعد پولیس نے سجاداورجاویدسمیت 3 ملزمان کو حراست میں لے لیا۔پولیس کا کہنا ہے کہ واقعے میں ملوث لڑکی کے تایا، چچا اور کزن سمیت دیگر 7 ملزمان کی گرفتاری کے لیے چھاپے مارے جارہے ہیں۔ جبکہ وزیر اعلیٰ پنجاب سردار عثمان بزدار نے دوبھائیوں پر تشدد کے واقعہ کا سخت نوٹس لیتے ہوئے ڈی پی خانیوال سے فوری رپورٹ طلب کرلی ۔عثمان بزدار نے کہاکہ تشدد کانشانہ بننے والے بھائیوں کوہرقیمت پر انصاف فراہم کیاجائے۔انہوں نے ہدایت کی کہ ذمے داروں کیخلاف قانون کے تحت کارروائی عمل میں لائی جائے ۔
